Quinta, Dezembro 08, 2022
Total visitors: 692025

Membru Polisia Nasional Timor-Leste (PNTL) ho idade 60 anos ba leten bele fila ona ba vida sivil tanba lei estatutu foun PNTL fo dalan ba membru PNTL sira hodi bele reforma.

Vise Ministru (VM) Ministerio Interior (MI), Antonio Armindo, dehan ba oin membru polisia sira ne’ebe mak idade avansadu bele prosesu ona ba reforma husi instituisaun.

Vise Ministru (VM) Ministerio Interior (MI), Antonio Armindo, dehan ba oin membru polisia sira ne’ebe mak idade avansadu bele prosesu ona ba reforma husi instituisaun (PNTL hodi kumpri estatutu pesoal polisia nian ne’ebe iha ona, tanba durante ne’e membru ne’ebe mak ho idade 60 ba leten servisu nafatin.

“Ba oin membru polisia ho idade 60 anos bele reforma no fila ba vida sivil,” VM MI Armindo dehan iha Centro Formasaun Polisia Comoro, Dili.

Nia dehan, iha tempu besik sei akontese reforma ba membru sira ne’ebe mak idade tama ona ba 60 anos, sira sei la hala’o ona knar hanesan polisia maibe fila ba vida sivil, deskansa ho servi familia.

Reforma membru sira ne’e mos parte ida hodi kuntribui ba hadia kualidade no rezolve tiha problema sira ne’ebe akontese iha instituisaun PNTL, depois mak rekruta membru foun.

“Bazeia ba estatutu foun ne’e ita rezolve tiha membru ne’ebe mak idade avansadu, depois hadiak tiha kualidade hodi rezolve problema sira ne’ebe akontese rezolvidu tiha mak ita halo rekrutamentu ba membru foun nune’e bele substitui fali sira ne’ebe mak reforma ona,” VM MI dehan.

Tanba ne’e nia dehan, instituisaun PNTL ho Ministeriu Interior tenke kumpri ba regra lei no estatutu pesoal ba PNTL, atu halo reforma ba membru polisia ho idade 60, no komandu identifika ona depois haruka sira kompleta dokumentu submete ba governu nune’ebe bele reforma.

“Reforma sira ne’ebe la’os tanba ita dezafia sira nia kapasidade maibe, sira idade mos avansadu ona, presija deskansa iha uma no fo tempu tomak ba familia,” nia salienta.

Entretantu, Komandante Jeral PNTL, Komisariu Faustino da Costa hatete membru PNTL ne’ebe tama ona ba idade avansadu hamutuk nain 160, no sira ne’e durante ne’e la reforma tanba estatutu pesoal PNTL la iha.

“Maibe ho estatutu PNTL foun ne’e fo dalan ba ita nia membru ne’ebe mak ho idade 60 ne’e iha ona oportunidade hodi reforma,” Komisario Costa dehan.

Iha parte seluk, Diretor Ezekutivu Fundasaun Mahein, Abel Amaral, dehan komandu labele obriga membru ho idade avansandu ne’e servisu tanba sira la iha ona forma hodi halo servisu, maibe sira tenke deskansa.

“Ita husu governu estatutu pesoal ne’e sai ona, tenke aselera lalais prosesu ba polisia ne’ebe idade avansaun hodi hetan reforma, tanba membru barak mak mate ona maibe la iha lei ida atu kesi sira,” FM Amaral dehan.

Nia dehan, tinan 22 ona ezistensia PNTL labele husik nune’e deit la iha lei ida hodi regula membru sira ne’ebe tama ona ba idade reforma kontinua servisu, ida ne’e la diak.