Quinta, Dezembro 08, 2022
Total visitors: 692025

Falintil-Forsa Defesa Timor-Leste (F-FDTL) nia Komponente Naval iha ona kapitaun ró hamutuk nain 14 hodi prepara ba funsionamentu Autoridade Marítima.

Falintil-Forsa Defesa Timor-Leste (F-FDTL) nia Komponente Naval iha ona kapitaun ró hamutuk nain 14 hodi prepara ba funsionamentu Autoridade Marítima.

Komandante Komponente Naval, Higinho das Neves, dehan preparasaun ba funsionamentu Autoridade Marítima nian, dadaun ne’e, prepara ona liu-liu husi rekursu-umanu kona-ba oinsá atu utiliza ró hirak ne’e ba atividade operasaun.

“Dadaun ne’e prepara ona kapitaun ró hamutuk nain 14. Sira ne’e iha koñesimentu oinsá bele lori ró kiik ka bo’ot. Sira prepreparadu ona,” Komandante Neves dehan iha Kuartel Naval Hera.

Nia hatete, kapitaun ró nain 14 refere bele lori ró ki’ik ka bo’ot, tanba durante ne’e sira mak utiliza ró naval nian hodi halo operasaun iha tasi, nune’e mós lori ró Berlin, nune kapitaun ró nian iha naval sufisiente ho preparadu.

“Ita-nia kapitaun ró nain 14 ne’e, tuir formasaun kona-ba operasaun ró nian, durante tinan ida iha Australia no oras ne’e nain-rua tuir tan formasaun iha China. Sira fila mai tan hamutuk nain 16 ona,” nia dehan.

Komandante Neves dehan, kona-ba operasaun ró Naval preparadu ona, hein de’it governu atu kompleta tan lantas, nune’e bainhira funsiona, Autoridade Marítima utiliza de’it.

“Dadaun ne’e ita iha ró haat (4) mak ita utiliza hodi halo patrulhamentu iha tasi, maibé ró hirak ne’e kiik no nia kapasidade la to’o atu bele tama to’o tasi parte sul nian,” nia salienta.

Enkuantu nia dehan, kona-ba funsiona Autoridade Marítima ne’e governu Australia oferese ona ró rua (2) no sei to’o Timor-Leste iha tinan 2023.

Entretantu, Prezidente Komisaun B, Trata Asuntu Defesa no Seguransa iha Parlamentu Nasional, Deputadu José Agustinho Sequera “Somotxo” dehan, estabelesimentu Autoridade Nasional Marítima ne’e deside ona katak Diretór mak Komandante Unidade Naval rasik, tanba sira mak hatene liu kona-ba área naval nian.

“Kona-ba preparasaun rekursu sira mak responsabilidade, tanba ne’e kona-ba atu utiliza ró ne’e sira prepara ona komesa husi 2020 liubá, hein de’it governu atu kompleta de’it lantas nune’e sira bele utiliza,” Deputadu Somotxo dehan.

Nia husu ba Komandante Komponente Naval, atu kuntinua halo preparasaun ba parte sira ne'ebé iha sira-nia responsabilidade, nune’e, tempu to’o atu funsiona Autoridade Nasional Marítima preparadu ona.