- Publika iha: 26 Setembro 2022
Komandu Falintil-Forsa Defesa Timor-Leste (F-FDTL) koloka ona membru fuzilerios foun hamutuk nain 68 hodi asegura tasi teritorial.
General Falur Rate Laek Xefe Estadu Maior Geral F-FDTL, Tenente dehan, asegura seguransa ba tasi Timor ne'e importante tanba hodi kontrola riku soin Timor nian iha tasi.
"Ita koloka tan membru fuzilerios hamutuk nian 68 ba postu naval iha teritoriu laran hodi asegura tasi teritoril tanba ita nia baliza tasi ne'e luan liu kompara ho rai maran," Tenente General Rate Laek dehan iha Baze Naval Hera.
Nia dehan, Estadu no governu Timor-Leste investe makas liu iha F-FDTL, liu-liu komponente naval nune'e bele asegura tasi hodi kontrola riku soin Timor nian ne'ebe mak barak tebes lakon iha tasi husi peska ilegal.
"Ita koloka ona membru hamutuk nian 68 ne'e maibe ida ne'e la sufsiente tanba ne'e rekrutamentu membru foun F-FDTL, tinan ida ne'e prioridade liu ba iha komponente naval," General Falur hateten.
Nia dehan, laos kontrola deit riku soin tasi nian maibe halo mos intervensaun ba trasaksaun krime organizadu ilegal sira husi tasi.
"Konaba ekipamentu no lantas ita sufsiente, konaba kapasidade mos naton, maibe ita dezafia nafatin nune'e bele iha formasaun ne'ebe adekuadu ba membru naval nian," nia dehan.
Entretantu, Diretor Ezekutivu Fundasaun Mahein (FM), Abel Amaral, hatete durante ne'e membru F-FDTL liu-liu komponente naval, tenke halo servisu operasaun iha tasi ho seriu hodi bele halo intervensaun ba krime sira iha tasi laran.
"Misaun komponente naval ne'e la'os iha rai maran maibe halo seguransa iha tasi hodi kontrola movimentu hotu iha area tasi nian, maibe durante ne'e asegurasaun tasi ne'e mensu tanba rekursu humanu," nia dehan.
Nia dehan, operasaun hodi asegura rikusoin iha tasi no kontrola peska ilegal ne'e importante tanba ne'e tenke aumenta rekursu humanus.
"Maibe ita hare komandu F-FDTL koloka tan membru fuzileiros nain 68 ba postu naval iha teritoriu laran ne'e pozitivu tebes nune'e sira nia prezensa iha tasi labele falta," Diretor Amaral dehan.
Nia dehan, konaba destakasaun membru los ona, maibe governu presija kompleta tan ro ba forsa naval tenke sosa foun.