Quinta, Dezembro 08, 2022
Total visitors: 692025

Prezidente Komisaun B Trata Asuntu Seguransa no Defesa iha Parlamentu Nasional, Deputado Jose Agustinho Sequera Somotxo, dehan operasaun konjunta importante tebes tanba lori Falintil-Forsa Defesa Timor-Leste (F-FDTL) ho Polisia Nasional Timor-Leste (PNTL) besik liu ba komunidade sira iha rai laran.

Prezidente Komisaun B Trata Asuntu Seguransa no Defesa iha Parlamentu Nasional, Deputado Jose Agustinho Sequera Somotxo, dehan operasaun konjunta importante tebes tanba lori Falintil-Forsa Defesa Timor-Leste (F-FDTL) ho Polisia Nasional Timor-Leste (PNTL) besik liu ba komunidade sira iha rai laran.

Nia dehan, autoridade sira husi instituisaun F-FDTL no PNTL ne’e sira nia servisu mak tenke garante paz estabilidade iha rai laran, tanba ne’e tenke hakbesik an ba komunidade liu husi aktividade operasaun konjunta sira.

“Operasaun konjunta ne’ebe mak realiza entre F-FDTL no PNTL, importante tebes atu sira bele hakbesik an ba komunidade, halo belun ho komunidade sira nune’e bele hare malu hanesan amigo, laos inimigo,” Deputado Somotxo dehan.

Nia dehan, konflitu sira ne’ebe akontese iha rai laran mai husi komunidade, entre joven ho joven, nune’e mos joven hasoru autoridade seguransa, no atu prevene konflitu hirak ne’e F-FDTL no PNTL tenke hakbesik an ba komunidade.

“Bainhira imi hakbesik an hela deit ba komunidade joven sira, ida ne’e kuntribui tebes ba prevensaun krime iha kapital Dili,” nia sujere iha parlamentu nasional.

Tanba ne’e nia dehan, misaun F-FDTL no PNTL ne’e klaru tiha ona katak servisu ba povu liu husi aktividade asegurasaun seguransa, tanba ne’e operasaun konjunta ne’e importante tebes.

Tanba ne’e nia dehan, aktvidade operasaun konjunta ne’ebe mak realiza iha kapital Dili ne’e rezultadu diak tebes tanba, halo duni prevensaun ba aktru kirme iha fatin publiku nune’e mos nivel kada bairu nian.

“Ita hare problema ne’ebe mak durante ne’e akontese kintu kantu iha kapital Dili ne’e depois de operasaun konjunta ne’e konfrontasaun sira iha dalan publiku no bairu sira la akontese kedan,” nia dehan.

Tanba ne’e nia dehan, operasaun konjunta ne’ebe mak F-FDTL no PNTL realiza ne’e hanesan medida prevensaun ba konflitu iha rai laran.

Iha parte seluk, Komandante Polisia Munisipiu Dili, Superientendente Xefe Henrique da Costa, dehan opersaun konjunta ne’ebe mak F-FDTL no PNTL realiza ne’e nu’udar medida prevensaun ba krime iha Dili laran nune’e mos lori F-FDTL no PNTL besik ba komunidade.

Nia dehan, operasaun konjunta ne’e, Komandu F-FDTL no PNTL hala’o bazeia ba despaixu ho numeru 01/MI-MD/IX/2022, hodi autoriza PNTL no F-FDTL halo operasaun atu prevene krime sira ne’ebe perturba orden publika.

“Operasaun konjunta ne’ebe hala’o durante ne’e, konsegue responde preokupasaun sidadaun sira tanba situasaun iha kapital Dili hakmatek no laiha violensia ruma mosu iha sosiedade nia le‘et,” nia dehan.

Nai dehan, operasaun konjunta ne’e hare liu ba area risku ba konflitu nune’e mos halo sosializasaun ba eskola sira konaba prevensaun konflitu, maneira hirak ne’e mak instituisaun rua ne’e realiza hodi hakbesik ba komunidade.