Sábado, Outubro 01, 2022
Total visitors: 668062

Durante fulan 8 nia laran hahu husi fulan janeiru to'o agustu 2022 ema nain 61 mak lakon vida tanba asidente trafiku iha teritoriu laran.

Portavoz Polisia Nasional Timor-Leste (PNTL), Superientendente Xefe Armando Monterio dehan, total asidente trafiku hamutuk 1.336 iha estrada publiku iha teritoriu laran tomak.

Portavoz Polisia Nasional Timor-Leste (PNTL), Superientendente Xefe Armando Monterio dehan, total asidente trafiku hamutuk 1.336 iha estrada publiku iha teritoriu laran tomak.

"Husi total numeru asidente 1.336 ne'e grave 289, kaman 1.522, lakon vida hamutuk 61 durante fulan 8 nia laran," Portavoz Monterio hatete.

Nia dehan, asidente trafiku refere akontese envolve kareta ho motor, sidadaun sira kondus transporte halai la kontrola a'an, hakarak ansi atu to'o lalais, hodi rezulta monu mesak, soke malu ida ne'e mak durante ne'e akontese.

"Husi asidente trafeku sira maioria, motorizada, tanba sidadaun sira halai la kontrola aan, depois la uza kapasete, bainhira akontese asidente rejulta kanek todan, kanek kaman no mate iha estrada publiku," nia salienta.

Nia dehan, asidente trafeku sira ne'ebe akontese PNTL hanesan autoridade seguransa nafatin husu ba sidadaun sira ne'ebe uza transporte halo viajem ba mai tenke kontrola a'an, labele ansi atu halai ho velosidade maka'as nune'e labele akontese asidente trafiku.

“Ita husu ba sidadaun se se deit iha kareta ho motor bainhira viajem respeita lei kodigu estrada, bainhira kondus motor tenke uza kapasete atu bele salva imi nia vida bainhira envolve iha asidente trafegu, tanba ita ema la fa'an hanesan kareta ho motor, tanba ne'e ita hotu tenke kuidadu nafatin uza transporte," nia dehan.

Entretantu, Komandante Tranzitu Munisipiu Dili, Inspektor Domingos Gama dehan, asidente trafiku ne'ebe mak tranzitu Dili rejistu hahu husi fulan janeiru to'o agustu ne'e iha kapital Dili iha 793 husi ne'e asidente fatal ne'e iha 12.

"Kauza husi asidente trafiku sira ne'e mak konsiensia ema nian la iha no la respeita sinais tranzitu sira ikus mai mosu asidente no balun hodi lakon Vida," Inspektor Gama dehan.

Tanba ne'e husu ba motorista sira halo movimentu iha dalan publiku ne'e tenke respeita sinais tranzitu sira iha dalan publiku nune'e labele mosu asidente nune'e mos tenke uza kapasete.