- Publika iha: 06 Setembro 2022
Falintil-Forsa Defesa Timor-Leste (F-FDTL) hamutuk ho elementu sira Tentara Nasional Indonesia (TNI) kopera ho hodi apoiu halo prevensaun ba aktividade ilegal hotu ne'ebe mak akontese iha fronteira terestre entre Timor-Leste ho Indonesia.
Xefe Estadu Forsa Defesa Indonesia, Jeneral TNI Andika Perkasa dehan, durante ne'e militar husi Timor-Leste no Indonesia sempre servisu hamutuk hodi kontrola aktividade ilegal iha fronteira, maibe tanba menus rekursu husi parte rua ne'e mak sempre akontese sasan ilegal tama no sai.
"Maibe hau prontu atu ajuda militar Timor-Leste iha fronteira, bainhira husu ami nia apoiu halo prevensaun ba aktividade ilegal tuir forsa ne'ebe mak ami iha no preparadu ona durante ne'e," Jeneral Perkasa dehan iha quartel jeneral F-FDTL iha Fatuhada, Dili.
Enkauntu nia dehan, bainhira identifika membru Tentara Nasional Indonesia (TNI) mak fasilita aktividade ilegal iha fronteira, tenke kontaktu ba direta ba Komandu TNI nune'e bele prosesu tanba la autoriza fasilita aktividade ilegal.
"TNI sei la apoiu mesak militar maibe, apoiu mos Unidade Patrolhamento Fronteira (UPF) nune'e servisu migrasaun no Ministeriu Komersiu Industria konaba aktividade ilegal hotu iha fronteira," General Perkasa informa.
Entretantu, Xefe Estadu Maior F-FDTL, Tenente-Jeneral Falur Rate Laek dehan, existensia F-FDTL ba dalan 47 ne'e pozitivu tebes ba tanba hetan apoiu servisu entre TNI nune'e mos Forsa Armada Portugal, Nova-Zelandia no Australia.
"Ita hetan apoiu husi TNI hodi halo servisu prevensaun ba aktividade ilegal iha fronteira, nune'e mos treinamentu ba Forsa Naval no Aero," Tenente Jeneral Rate Laek dehan.
Tanba ne'e nia dehan, apoiu prevensaun ba aktividade Ilegal ne'e diak tebes tanba militar Timor-Leste no TNI servisu hamutuk hodi kontrola iha fronteira.
"Ita espera katak ho servisu koperasaun ne'ebe iha bele minimiza aktividade ilegal tanba ne'e krime," nia esperansa.