Iha serimonia aniversario Komponente Naval, ba dala 20, Prezidente da Republika Fransisco Guterres Lu Olo, husu komponente naval lizeira Falintil Forsa Defesa Timor-Leste (F-FTDL) tenke hala’o knar ho diak hodi prevene hahalok kriminal iha area Tasi Timor nian.

Iha serimonia aniversario Komponente Naval, ba dala 20, Prezidente da Republika Fransisco Guterres Lu Olo, husu komponente naval lizeira Falintil Forsa Defesa Timor-Leste (F-FTDL) tenke hala’o knar ho diak hodi prevene hahalok kriminal iha area Tasi Timor nian.

Prezidente Lu Olo hateten knar ne’ebe mak durante ne’e liu-liu komponente naval halo ne’e diak ona maibe presija halo diak liu tan iha servisu kontrolo hodi halo prevensaun ba krimi iha area juridika Tasi Timor nian.

“Ita husu atu komponente naval tenke halo prevensaun ba krimi iha Tasi Timor no halo fiskalizasaun ba aktividade peska iha tasi nune’e mos rai maran hodi garante no asegura riku soin Timor nian iha tasi,” PR Lu Olo hateten.

Nia dehan, ikus-ikus ne’e peska ilegal iha Tasi Timor komesa akontese tanba ne’e husu atu forsa naval bele serviso diak hodi kontrola tasi.

Alende ne’e nia dehan, komponente naval servi Timor-Leste hodi defende interese nasaun nian iha tasi, atu nune’e Timor-Leste no Timoroan sira bele uza tasi ba sira-nia moris loro-loron, laos de’it ba atividade militar, maibe ba atividade hotu ho natureza sivil, ne’ebe inklui apoiu ba Autoridade Maritima Nasional.

“Ita hare mos katak komponente naval iha ona matenke ho fleksivel ho meios ne’ebe mak moderno ho rekursus ne’ebe mak kualifikado treinado hodi bele asegura Tasi Timor no prevene krimi diak liu tan,” nia hateten.

Tanba ne’e ho votu esperansa iha futuru nu’udar Prezidente da Republika nafatin fo korajen ba komponent naval hodi serví nafatin rai Timor-Leste hanesan bai-bain hodi kuntribui no tane aas Komponente Naval Forsa Defesa Timor-Leste nia naran iha mundo.

Entretanto, Komandante Komponente Naval, Kapitao Fragata Joao da Silva, hateten atu asegura Tasi Timor no halo prevensaun ba krimi iha tasi komponete naval iha ona rekusrus naton ne’ebe mak durante ne’e hodi halo serviso ba area hirak ne’e durante ne’e.

“Atu hadia servisu prevensaun krimi iha tasi diak liu tan presija investe iha area tolu hanesan, infraestrutura, meios, no rekurus humanu,” Komandante Silva hateten.

Alende ne’e nia dehan, durante ne’e komponente naval rejisto ro peska ilegal hamutuk 50 no oras ne’e dadaun prosesu la’o hela, no Forsa Naval nafatin esforsu hodi kontrola fronteira maritima husi aktividade ilegal sira.