Komandu PNTL Hasai Ona Membru Nain 4

Komandu Polisia Nasional Timor-Leste (PNTL) liu husi enkontru konselhu superior deside hasai membru nain 4 tanba kontra regras disiplinar inklui abandona servisu, tama servisu la tuir oras, uza sala arma.

"Membru nain haat (4) ne'e ita hahu prosesu iha tinan 2020, no ohin hetan ona rezultadu final hodi hasai husi instituisaun Polisia Nasional Timor-Leste," Sekretariu Jeral Konselhu Superior, Superientendente Xefe Carlos Geronimo hateten.

Tanba ne'e nia dehan, membru hirak ne'e fila ona ba vida sivil no tanba komete kazu krimi sei kuntinua prosesu iha tribunal.

"Husu ba membru sira ne'ebe mak sei hola parte iha instituisaun PNTL tenke kumpri regras disiplinar nune'e bele mantein hanesan membru polisia ida nafatin," nia salienta.

Entretantu, Prezisente Komisaun B iha Parlamentu Nasional, trata Asuntu Defesa no Seguransa, Deputado Jose Agustinho Sequera Somotcho hateten, sansaun displinar ne'ebe mak Komandu Jeral PNTL foti pozitivu tebes nune'e membru sira labele halo krimi arbiru no hala'o knar iha terenu tuir ordem.

"Sansaun disiplinar ne'ebe mak komandu aplika ba membru sira, nune'e sira bele responsabilidade ba aktu krimi ne'ebe mak sira komete," Prezidente Komisaun B Somotcho hateten.

Tanba ne'e Komisaun B husu ba futuru membru ne'ebe mak komete iha kazu krimi tenke submete ba prosesu no aplika sansaun disiplinar.