- Publika iha: 20 Dezembro 2021
FALINTL-Forsa Defesa Timor-Leste (F-FDTL), nia Unidade Polisia Militar (PM) hamutuk ho Polisia Nasional Timor-Leste (PNTL) forma ona ekipa konjunta hodi halo operasaun hodi asegura festa Natal no Tinan Foun iha kapital Dili.
Xefe Departamentu Justisa, iha PNTL, Superintendente Xefe Augustino Gomes, hateten operasaun konjunta refere ho maneira lao ain tama sai bairu iha Dili laran nune'e mos halo passa revista ba arma branka sira inklui tudik no kroat seluk.
Nia dehan, operasaun ne'ebe mak PM-PNTL halo hodi asegura movimentu komunidade hotu nian hodi selebra festa natal tinan foun ho movimentu livre ho la iha ema ida mak fora limite.
"Operasaun konjunta ne'e ita hahu lansa ona no sei retama iha dia 3 fulan Janeiro," Superintendente Xefe Gomes hateten.
Nia haktuir katak sei la tolera se deit mak halo konflitu ka krime iha natal no tinan foun inkliu membru polisia no F-FDTL kria konflitu, no sei kaptura hotu ho submete ba prosesu legal.
"Ema se deit mak komete iha krime ita sei kaptura hodi loke prosesu ba nia hodi responde no responsabilidade ba aktu krime ne'ebe nia halo. Ita sei la fo toleransia ba nia," nia hatete.
Nia apela mos ba komunidade hotu iha kapital Dili laran, liu-liu joven sira, bainhira konsumu alkohol lanu hare toba hakmatek, labele lao sai arbiru hodi kria problema tanba ema hotu hakarak selebra natal no hakmate no lakoi akontese problema.
Iha fatin hanesan, Kapitaun Francisco Xavier Dos Reis Neto, Komandante Interinu PM hateten, operasaun refere sei kontrola mos membru seguransa husi instituisaun F-FDTL no PNTL bainhira halo konflitu mos sei la iha toleransia.
"Membru husi instiruisaun rua ne'e mak tenke sai ezemplu ba joventude sira tenke kria paz no estabilidade hodi komemora loron kosok oan moris, ba kualker se deit mak halo krime ka barulhu la iha tolesansia," Kapitaun Xavier hateten.