- Publika iha: 27 Julho 2021
Unidade Polisia Maritima (UPM) kontinua halo operasaun kontrola ba aktividade ilegais sira ne’ebe mak liu husi tasi inklui pesca ilegal, negosiu ilegal, movimentu ilegal no aktividade ilegal seluk tan.
Komandante UPM, Superintendente Polisia Basilio de Jesus hateten, Timor-Leste nudar nasaun soberana ida la autoriza entidade se deit mak halo aktividades ilegais tama iha teritoriu laran.
“Atu antisipa aktividade ilegais sira ne'e, ita kuntinua orienta membru sira iha postu hotu hodi reforsa patrolimento hodi kontrola aktividade ilegais hotu iha tasi," Komandante UPM Superientendente Jesus hateten.
Nia dehan, operasaun UPM nian hahu husi tasi iha teritoriu Timor nian hosi Dili ba to’o Batugade, tasi parte Atapupu no Alor nian leet, iha patrulhamentu mak hetan ema ruma halo aktividade ilegal UPM la tolera tenke kaptura.
"Ita nia misaun mak halo patrulha ba aktividade ilegal sira hanesan negosiu ilegais hatama sigaru, peska ilegais, droga, money laundry, trafiku umanu, armas ilegais, sira ne’e hotu sai ita nia target operasaun," nia hateten.
Nia dehan, durante ne'e aktividade operasaun ne'ebe sira halo iha tasi, utiliza deit ro rua hanesan Kairala no Lusitania no membru UPM sira mak opera rasik.
Alende ne'e nia dehan, Komandu UPM mos iha ona planu atu kontrui tan postu iha Lore, Beasu, Betanu no Citrana hodi destaka membru sira halo operasaun iha tasi.
Entretantu, Vise Ministru Interior, Antonio Armindo hateten, durnte ne'e Polisia Timor-Leste (PNTL) liu-liu Unidade Polisia Maritima ne'e progresu servisu diak tebes tanba asegura tasi tuir duni ordem.
"Tanba ne'e ita iha ona planu fixu ona hodi apoiu ro ida ba Unidade Polisia Maritima nune'e bele apoiu sira halo operasaun iha tasi hodi kontrola movimentu ilegal iha tasi," Vise MI Armindo hateten.
Nia dehan, servisu UPM risku tebes tanba 24 horas iha tasi laran deit tanba ne'e governu tenke tau osan hodi apoiu no hadia sira nia kondisau.