Domingo, Junho 20, 2021
Total visitors: 566016
Komandante Polisia Munisipiu Dili, Superientendente Xefe Henrique da Costa hateten, area ne’ebe mak risku ba konflitu iha kapital Dili la’os iha aldeia Temporal deit maibe iha area barak mak identifikadu ona.

Xefe Suku Bekora, iha munisipiu Dili, husu komandu PNTL atu monta postu vizilansia ida iha Aldeia Bekora Temporal, tanba iha area refere risku ba konflitu.

Xefe Antonio da Silva Soares hateten, iha Bekora area ne’ebe mak sempre akontese konflitu mak aldeia Temporal no husi parte polisia sempre halo atuasaun tarde.

“Tanba ne’e husu polisia komandu munsipiu Dili atu monta postu vizilansia ida iha aldeia Bekora Temporal nune’e bele kontrola movimentu kriminozu sira nune’e bainhira kontese konflitu bele halo atuasaun lalais,” nia hateten.

Nia salienta tan, iha Bekora area ne’ebe mak risku ba konfilitu primeiru Temporal.

“Ami autoridade lokal hanesan Xefe Suku no Xefe Aldeia hamutuk ho komunidade sira halo ona konferensia imprensa dalan ida hodi husu ba polisia nune’e bele monta netik postu vizilinsia no fo segurnsa ba komunidade,” Xefe suku Silva hateten via telefone.

Maibe nia dehan, to’o oras ne’e seidauk hetan resposta pozitivu husi parte polisia konaba kria postu vizilansia hodi responde ba preokupasaun komunidade nian.

Entretantu, Komandante Polisia Munisipiu Dili, Superientendente Xefe Henrique da Costa hateten, area ne’ebe mak risku ba konflitu iha kapital Dili la’os iha aldeia Temporal deit maibe iha area barak mak identifikadu ona.

“Area ne’ebe ita identifikadu ona mak Bairu-Pite iha aldeia Haburas, Oebadak, Surikmas no Comoro, husi area risku ba konflitu hirak ne’e ita instala ona postu vizilansia iha Bairu-Pite hodi halo vizilansia ba aldeia rua ne’e, foin lalais ita halo inagurasaun,” Komandante Dili Superientendente Xefe Costa informa.

Nia dehan, husi area risku hirak ne’e sei monta postu vizilansia maibe tenke fazeadamente laos halo dala ida deit tanba presija rekursu no orsamentu.

“Dadaun ne’e ita nia rekursu la to’o hodi monta postu vizilansia tanba ita koloka hotu iha fronteira, izolamentu no kuarentena,” nia hateten.

Tanba ne’e nia hateten, dadaun ne’e polisia bele monta ona postu polisia iha area hirak ne’e maibe hare fali ba rekursu ne’ebe mak dadaun ne’e polisia iha koloka hotu ona maibe nafatin la to’o.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04