- Publika iha: 13 Maio 2021
Governu liu husi Ministeriu Saude no Polisia Nasional Timor-Leste (PNTL) husu obrigatoriu komunidade hotu tenke tuir swab nune’e ba sira ne’ebe afetadu bele asegura iha izolamentu atu labele halo transmisaun ba familia ka komunidade sira seluk ne’ebe livre husi virus.
Ministra Saude, Doutora Odete Maria Freitas Belo hateten, aktividade swab ne’e obrigatoriu ba komunidade hotu tanba tuir rezultadu swab ne’ebe mak ekipa saude halo no hetan apoio seguransa husi polisia ne’e hatudu katak numeru afetadu ne’e a’as tebes.
“Iha aktividade swab ne’e balun ne’e detetadu infeksaun tenke halo izolamentu nune’e labele transmite moras ne’e ba ema seluk,” Ministra hateten.
Nia dehan, ba sira ne’ebe mak rezultadu pozitivu submete ba izolamentu nune’e hodi bele halo tratamentu nune’e bele rekopera no labele daet ba familia ka komunidade seluk.
“Dadaun ne’e ministeriu saude hetan apoiu husi parte seguransa Polisia Nasional Timor-Leste hodi halo cek point iha dalan publiku, bainhira hetan komunidade sira ne’ebe mak halo movimentu tenke obrigatoriu submete ba teste swab,” nia dehan.
Nia dehan, dadaun ne’e aktividade swab ne’e halo hela kada suku nune’e mos iha edifisiu publiku no privadu sira no obrigatoriu komunidade hotu tenke tuir.
Entretantu, porta voz PNTL, Superientendente Xefe Arnaldu Araujo, hateten komunidade hotu obrigatoriu tenke tuir teste swab no kumpri regras protuklu ne’ebe saude fo sai ona hodi halo prevensaun ba transmisaun komunitaria Covid-19 iha Timor-Leste.
Nia dehan, dadaun ne’e moras Covid kuntinua aumenta kada loron no governu hasai ona rezolusaun ne’ebe mak forte nune’e komunidade hotu bele kumpri maibe komunidade nafatin kontra.
“Tanba ne’e Polisia Nasional Timor-Leste (PNTL) husu ba komunidade hotu tenke obrigatoriu tuir teste swab nune’e bele hatene ida-ida nia kondisaun nune’e mos kumpri protukolu husi ministeriu saude hodi bele halo prevensaun ba transmisaun Covid,” nia dehan.
Nia dehan, ba komunidade ne’ebe mak la kumpri regras protukolu ne’ebe mak governu fo sai ona hodi tuir swab, bainhira nia pozitivu nia rasik mak seluk kustu fatin izolamentu nian.
“Ita husu ba komunidade hotu nia konsiensia nune’e bele kuntribui ba prevensaun ho hakotu covid-19 iha ita rain Timor,” portavoz PNTL Araujo hatetetn.
Tanba ne’e nia dehan, polisia nafatin implementa lei, karik komunidade sira la kumpri polisia kaptura no submete ba prosesu tanba ne’e konsidera krimi.