- Publika iha: 27 Abril 2021
Sekretariu Estadu Protesaun Sivil (SEPS), hahu transporta apoio hunanitaria ba Ilha Atauru, munisipiu Dili, ho helikopteru ne'ebe mak suporta husi governu Australia.
"Ohin ita hahu utiliza transporta apoio hunanitaria ba vitima sira iha Atauru ho Aviaun," SEPS Joaquin Gusmao Martins hateten.
Nia dehan, durante fulan ida nia laran kada loron iha oras 4 SEPS utiliza helikopteru refere hodi transporta apoio emergensia ba area remotas iha rai laran.
"Iha Atauru total vitima ne'ebe afeta ba dezastre naturais hamutuk 58 familias no ohin ita halo ona apoio emergensia depois iha foti dadus hodi halo konstrusaun ba uma ne'ebe mak hetan estragus,” nia salienta.
Alende ne'e nia dehan, depois de Atauru SEPS sei transporta fali apoiu humanitariu ba iha munisipiu Viqueque.
Entertantu, Prezidente Autoridade Postu Atauru, Aparicio da Silva, hateten total vitima ne'ebe mak identifikadu nain 58 maske vitima balun seidauk identifika.
"Ohin ita distribui uluk ba vitima nain 58 ne'e, depois mak ita identifika fali tama iha segundu etapa nian," nia informa via telefone.
Alende ne'e nia apela mos ba governu atu bele mos rezolve uma komunidade nian ne'ebe mak hetan estragus.