PNTL ho MTM Hahu Reativa Dezinfekta Fatin Publiku

Polisia Nasional Timor-Leste PNTL liu husi Komandu Munisipiu Dili ho grupu movimentu tasi moos MTM hahu reativa fali aktividade dezinfekta ba fatin publiku sira iha kapital Dili laran.

Segundu Komandante Munisipiu Dili Superientendente Euclides Belo hateten, aktividade dezinfektasaun ne’ebe mak PNTL ho grupu MTM halo iha fatin publiku ne’e tanba risku ba propagasaun transmisaun Covid-19.

“Iha reativa fali aktividade dezinfekta tanba fatin publiku sira ne’e movimentu barak tanba ne’e presija halo dezinfektasaun,” Segundu Komandante Dili Superientendente Belo hateten.

Nia dehan, fatin sira ne’ebe ekipa halo desinfekta ne’e inklui klinika, postu saude, fatin ne’ebe mak komunidade sira halibur malu barak no fatin sira ne’ebe mak identifika ona pozitivu Covid-19.

“Alende ne’e ita mos sei halo medida prevensaun hanesan sensibilizasaun hamutuk ho autoridade munisipiu Dili ba komunidade iha Dili laran, atu bele hado’ok an husi transmisaun lokal,” nia informa.

Iha fatin hanesan, Kordenador Movimento Tasi Moos (MTM), Gally Soares Araujo hateten, agora dadaun MTM iha aimoruk desinfektante hamutuk litru 3.200 bele rega iha fatin publiku sira.

“Ohin ami, PNTL no autoridade munisipiu Dili halo ona desinfektasaun iha fatin publiku balun ne’ebe mak sirkulasaun ema barak,” nia informa.

Nia dehan, fatin ne’ebe sira halo ona dezinfekta mak Palasiu do Governu oin, Jardim Largo Licedere, Jardim BJ Habibie, no iha area Tasi Tolu nian.

“Aktividade dezinfekta ne’ebe ami halo ne’e hanesan asaun voluntariu ida hodi antisipa ka hamenus numeru pozitivu Covid-19 iha Timor,” Kordenador MTM Soares salienta.

Nia dehan, aktividade ne’e hetan apoio husi Palasiu Prezidente, Ministeriu Saude, Entidade Publiku no Privadu hodi realiza aktividade dezinfektasaun iha fatin publiku.