Tranzito Kuntribui Reseita $25,000 Ba Kofre Estado Fulan Janeiru

Iha fulan Janeiro 2021, Unidade Polisia Tranzito Munisipio Dili kuntribui reseitas hamutuk $25,000 ba kofre estado.

Komandante Tranzito Munisipio Dili Inspektor Domingos Sarmento Gama hateten, reseita ne’ebe mak tranzito hatama ba kofre estado ne’e rekolha husi aktividade cek point ne’ebe mak halo iha kapital Dili laran.

“Cek point ne’e ita halo hahu husi dia 1 to’o dia 31 Janeiro ne’e ita rekoilha reseitas hamutuk $25,000 no kuntribui ona ba kofre estado,” Inspektor Gama informa iha servisu fatin, iha Kaikoli, Dili.

Nia dehan, reseitas ne’ebe mak tranzito hatama ba kofre estado iha fulan Janeiro 2021 kompara ho tinan kotuk tinan ne’e montante bo’ot liu tanba esforsu serviso makas liu.

“Montante $25,000 ne’e bo’ot tebes ne’e rezultado ne’ebe hatudo diak husi komandante, tanba bainhira komandante maduru ho halo serviso ne’ebe lolos elementos sira halo serviso iha tereno sei la falha no la tauk atu implementa lei,” nia heteten.

Nia informa, reseitas ne’ebe rekolha ne’e husi kareta ne’ebe para iha fatin publiku la tuir regras, la kompleta dokumento, la iha karta kondusaun, no balun la kompleta asesorius veikulu nian.

“Polisia nafatin aplika lei seguransa rodaviaria tanba ne’e komando nafatin husu ba sidadaun hotu katak tenke ba trata dokumento kareta ka motor nune’e halo movimeto livre atu nune’e labele hetan intervensaun husi polisia,” nia informa.

Iha parte seluk, kondutor Transporte Publiku, Alfredo dos Santos hateten, sai kondutor ne’ebe mak diak primeiro tenke kompleta dokumento kareta, sira bainhira halo movimento tenke kontrola kondisaun kareta, no bainhira halo sirkulasaun tenke kontrola nune’e labele mosu asidente.

“Bainhira ita halo movimento mak karta kondusaun la iha, surat surat la kompleto konta tilan hakarak ka lakoi ita tenke selu multa,” kondutor Santos dehan.

Nia dehan, durante nia lori kareta hahu husi 2012 mai to’o ohin loron nia selu multa dala ida ho montante $45 dolar tanba nia SIM mate, iha momento ne’ebe nia ba halo fali SIM to’o ohin loron nia halo movimento livre, tanba ne’e bainhira halo movento tenke kumpri lei.