Sábado, Março 06, 2021
Total visitors: 551764

Governo liu husi Ministerio Defesa kopera ho Komando Polisia Nasional Timor-Leste (PNTL) kria tan posto vizilansia hat (4) iha zona fronteira Timor-Leste no Indonesia hodi reforsa seguransa ba movimento ilegal hodi prevene ba surto corona virus tama rai laran husi fronteira.

Governo liu husi Ministerio Defesa kopera ho Komando Polisia Nasional Timor-Leste (PNTL) kria tan posto vizilansia hat (4) iha zona fronteira Timor-Leste no Indonesia.

Ministro Defesa, Filomeno Paixao, hateten posto vizilansia 4 ne’e hari iha area Batugade, Balibo, Covalima, no Oecusse, no posto sira ne’e hetan seguransa husi forsa ekipa Unidade Espesial Polisia (UEP), Unidade Patrulhamento Fronteira (UPF), Unidade Polisia Maritima (UPM), no FALINTL-Forsa Defesa Timor-Leste (F-FDTL).

“Posto 4 ne’e ita kria iha area ne’ebe mak identifikado ona risku ba movimento ilegal tama no sai iha tempo kalan no loron,” Ministro Paixao hateten.

Nia dehan, governo rasik mos husu ba komando F-FDTL hodi apoio masimo kontrolu iha area fronteira tanto terestre no maritima.

“Posto vizilansia hat ne’e sei halo operasaun ho serio hodi kontrola movimento tama sai no sei la akontese tan iha membro balun mak fasilita movimento ilegal,” nia informa.

Tanba ne’e nia dehan, to’o agora populasaun balun sei brani hakat liu fronteira hodi tama Timor-Leste tanba fasilita husi membro polisia balun, maibe ida ne’e sei la akontese tan.

Entretanto, Komandante Jeral Polisia Nasional Timor-Leste (PNTL), Comisario Faustinho da Costa hateten, durante loron rua aumenta tan posto vizilansia rua ne’e ekipa konjunta kaptura ona sidadaun nain 30 ne’ebe mak halo viagem ilegal.

“Sidadaun 30 ne’e komposto husi mane 13 no feto 17 ne’e ita kaptura deit iha area hirak ne’ebe mak ita foin monta posto vizilansia 4 ne’e,” Comisario PNTL Costa dehan.

Nia dehan, area ne’ebe mak aumenta posto vizilansia antes ne’e identifikado kedan katak risko bo’ot liu ba ema atu halo viagem tama no sai husi teritorio nasional husi dalan ilegal.

“Ita tau posto iha ne’eba atu ekipa konjuta komposto husi unidade sira iha polisia nian ho hetan apoio husi F-FDTL hodi bele kontrola no halo prevensaun ba surto corona virus,” nia hateten.

Tanba ne’e nia dahan, serviso ekipa halo operasaun durante 24 horas no fahe ba grupo rua hodi bele halo rotasaun iha tempu kalan no loron.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04