Deputado PN Husu Governo Hasa’e Salario UPF Ho F-FDTL Iha Fronteira

Deputado iha Parlamento Nasional (PN) husu governo atu hasa’e salario membro Unidade Patrolimento Fronteira (UPF) no Falintil-Forsa Defesa Timor-Leste (F-FDTL) ne’ebe halo serviso hodi asegura fronteira liu-liu durante surto mundial Covid-19.

Deputada Olinda Guterres hateten liga ba surto Covid-19 ne’ebe mak oras ne’e sa’e makas iha Atambua, Indonesia, no kada loron ema sempre mate ida ne’e fo amiasa makas mai Timor-Leste tanba ne’e membro UPF no F-FDTL tenke asegura makas iha fronteira.

“Tanba ne’e ita husu governo presija aumenta salario ba membro Unidade Patrulhamento Fronteira (UPF) no FALINTIL-Forsa Defesa Timor-Leste (F-FDTL) tanba sira ne’e serviso makas tebes ba prevensaun Covid-19 iha fronteira,” Deputada Guterres husu.

Nia dehan, membro PNTL no F-FDTL ne’ebe mak durante ne’e serviso makas hodi fo seguransa ba povu no rai ida ne’e ho salario ne’ebe mak minimo liu no la responde ba sira nia nesesidade.

“PNTL no F-FDTL halo patrulhamentu iha fronteira ne’eba, diak ba povu Timor tomak, tanba ne’e husu governu, aumenta forsa no salariu ba PNTL liu-liu UPF no Polisia Militar iha fronteira,” nia dehan.

Entretanto, Vise Ministro Interior Armindo Antonio dehan, atu hadia salario Polisia Nasional Timor-Leste ne’e, la’os fasil maibe presija hodi tempo.

“Atu aumenta salario PNTL ita tenke prepara buat barak liu-liu konaba dekreto lei hodi bele identifika lolos salario ne’ebe mak merese,” Vise MI Antonio informa.

Maibe nia dehan, dadaun ne’e governo hahu halo ona proposta lei ida espesifiku hodi identifika salario ne’ebe mak merese duni, maibe seidauk finaliza, no governo promete maske kleur maibe sei rezolve no dadaun ne’e sira la’o lai ho salario $215 Amerikano.