Ema Nain 78 Lakon Vida Durante Tinan 2020

Ema nain 78 lakon vida durante tinan 2020 tanba asidente trafiku ne’ebe mak akontese iha Timor-Leste territorio laran tomak.

Komandante Tranzito Nasional Superientendente, Joao Belo dos Reis hateten, asidente trafiku ne’ebe akontese durante ne’e maioria husi labarik minoridade sira ne’ebe mak utiliza motor no seidauk iha konhesimento diak ba sinais tranzitu ne’ebe mak iha dalan publiku sira.

“Total asidente trafiku ne’ebe mak ita rejisto hamutuk 1,422, husi ne’e nain 78 mak lakon vida, no seluk kanek kaman, balun todan,” nia informa.

Nia dehan, kauza husi asidente trafiku sira ne’e tanba lanu, halai kareta ka motor ho velosidade ne’ebe maka’as, no bainhira halo viagem lakontrola kondisaun transporte.

“Maibe ita hare asidente hira ne’e kontribui makas husi motor mio beat ne’e kompara ho motor seluk,” Komandante Reis dehan.

Alende ne’e nia dehan, ema ne’ebe lakon vida husi asidente trafiku iha tinan 2020 barak liu ho total nain 78 kompara iha tinan 2019 ho total nain 64 mak lakon vida.

Tanba ne’e, nia apela ba komunidade tomak ne’ebe mak utiliza motor ka kareta halo viagem tenke kuidado no kontrola kondisaun motor, nune’e mos motorista sira tenke respeita sinais sira ne’ebe mak destaka iha dalan publiku.

Entretanto, Komandante Polisia Munisipio Dili Superientendente Xefe Henrique da Costa hateten, durante tinan 2020, tuir dados ne’ebe mak polisia tranzito Munisipio Dili, ema ne’ebe mak lakon vida hamutuk nain 19.

“Total asidente ne’ebe mak ita rejisto hamutuk 786, mate nain 19, restu kanek todan no kaman maibe rekupera hotu ona,” nia dehan.

Tanba ne’e nia apela ba motorista sira bainhira halo movimento tenke mos respeito sinais tranzito sira, tanba bainhira kontra sempre mosu asidente.

Iha parte seluk kondutor Bis AZEZI, Teofilho Maria da Costa, hateten asidente ne’ebe akontese, balun mate no seluk tenke aleija ne’e tanba konsiensia ema nia mak la iha, halo movimento ho gensi nian mak hakarak to’o lalais.

“Tanba buat ida ita hakarak to’o lalais ne’e mak asidente mos mai lalais, tanba ne’e maluk kondutor sira bainhira halo movimento tenke ho kalma no respeita sinais sira ne’e mak estado monta iha dalan publiku,” nia dehan.