- Publika iha: 23 Dezembro 2020
Implementasaun Estado Emergensia (EE) ba dala ualu (8) halo membro Polisia Nasional de Timor-Leste (PNTL) labele feriado hodi ba selebra festa natal no tinan foun hamutuk ho familia tanba sira nafatin halo knar hanesan bai-bain.
Komandante PNTL, Komisariu Faustino da Costa, hatete selebrasaun festa natal no tinan foun ba tinan ida ne’e komando la autoriza membro PNTL sira halo feriado tanba implementasaun EE kuntinua hela.
“Ita nian membru PNTL tomak la iha feriadu atu ba hamutuk ho familia hodi selebra festa natal ho tinan foun, tanba governu kontinua implementa esatdu emerjensia hodi moras COVID-19 labele akontese,” Komisario PNTL Costa informa.
Tanba ne’e nia dehan, membru polisia tomak komandu PNTL sei la autoriza sira lisensa, polisia hotu tenke preparadu atu halo knar durante tempu natal no tinan foun nian.
“Seguransa ne’e, komando prioridade liu iha fronteira. Komando munisipio hotu sei kordena serviso hamutuk ho unidade hotu husi FALINTL-Forsa Defesa Timor-Leste (F-FDTL) hodi destaka no fo seguransa iha fronteira,” nia informa.
Tanba ne’e nia husu ba komando munisipio sira hotu tenke kopera ho F-FDTL hodi taka metin fronteira atu labele iha movimento iha natal no tinan foun.
“Iha natal no tinan foun ita garante paz no trankuilidade laos atu lori virus COVID-19. Tanba ita garante seguransa iha fronteira sei la akontese,” nia salienta.
Entretanto, Komandante Polisia Munisipiu Bobonaru, Superintendente Octavio de Araujo Bucar, hateten Komandu PNTL Munisipiu Bobonaru preparadu ona atu garante seguransa iha ambitu selebrasaun festa natal no tinan foun.
Nia dehan, komandu PNTL sei kordena ho komandu Unidade Patrulhamentu Fronteira (UPF), Batalhaun Orden Publika (BOP), Kompanhia Operasaun Espesial (COE), no FALINTL-Forsa Defeza Timor Leste (F-FDTL) atu servisu hamutuk hodi garante seguransa iha ambitu selebrasaun festa natal no tinan foun.
“Ami iha munisipiu Bobonaru prepara ona planu operasaun atu garante seguransa iha selebrasaun festa natal ho tinan foun, no la iha autorizasaun ba membro sira hodi ba feriado,” nia hateten.
Tanba ne’e nia dehan, festa natal no tinan foun 2020 seguransa iha fronteira konaba implementasaun estado emergensia kuntinua halo hodi kontrola movimento tama no sai husi fronteira legal no ilegal.