MI Identifika Membro PNTL Nain 20 Fasilita PSHT Iha Fronteira

Ministerio Interior (MI) identifika membro Polisia Nasional Timor-Leste (PNTL) nain 20 ne’ebe durante ne’e falisita grupo artes marsiais Persaudaraan Setia Hati Terate (PSHT) sira halo movimento ilegal iha fronteira hodi ba sae sabuk iha Indonesia.

Vise Ministro MI, Antonio Armindo hateten, membro nain 20 ne’e identifikado ona iha lista, hodi halo prosesu investigasaun ba akto ne’ebe mak membro hirak ne’e komete.

“Los duni katak membro PNTL balun durante ne’e mak fasilita movimento ilegal ba grupo artes marsiais iha fronteira hodi ba sae sabuk iha nasaun vizinhu Indonesia,” Vise MI Armindo dehan.

Tanba ne’e nia dehan, lista membro nain 20 ne’e haruka ona ba komado balun hetan ona demisaun, seluk seidauk tanba sei iha prosesu hodi hetan demisaun husi Instituisaun Polisia Nasional Timor-Leste.

Nia dehan, membro nain 20 ne’e maioria husi Unidade Patrulhamento Fronteira (UPF) nian, balun husi polisia bai-bain no Serviso Migrasaun.

“Dadaun ne’e prosesu lao ona hodi hein katak se mak sala obrigatorio tenke sai husi polisia no la sala kuntinua serviso,” nia informa.

Tanba ne’e nia dehan, durante ne’e movimento ilegal iha fronteira husi membro grupo artes marsiais PSHT ne’ebe mak autoridade kompetente halo investigasaun hamutuk 222, husi membro hirak ne’e prosesu hotu ona.

Entretanto, Komandante Jeral Polisia Nasional Timor-Leste (PNTL), Komisario Faustino da Costa hateten, membro PNTL ne’ebe mak identifika fasilita movimento ilegal iha fronteira ne'e iha ona prosesu investigasaun.

“Rezultado investigasaun ne’ebe mak ita halo membro nain 5 mak hetan ona demisaun no seluk ita aplika sansaun disiplinar ba sira,” Komisario Costa dehan.

Nia dehan dadaun ne’e komando hasai ona despaxu ida hodi kuntinua prosesu membro PNTL sira ne’ebe mak halo serviso iha lina fronteira la tuir orden estado nian no halo involve fali asunto privado ne’ebe mak lei bando ona iha Timor-Leste.