Sexta, Março 29, 2024
Total visitors: 766366

Deputado Komisaun B iha Parlamento Nasional ne’ebe trata asunto defesa no seguransa, David Diaz “Mandati” hateten, Polisia Cientifica Investigasaun Criminal (PCIC) la presija utiliza pistola tanba sira nia serviso ne’e halo deit identifikasaun ba krime sira.

Deputado Komisaun B iha Parlamento Nasional ne’ebe trata asunto defesa no seguransa, David Diaz “Mandati” hateten, Polisia Cientifica Investigasaun Criminal (PCIC) la presija utiliza pistola.

Nia dehan, Timor-Leste nasaun ki’ik, tanba ne’e la presija ema barak atu utiliza armas hodi lakon kontrola husi estado.

“PCIC ne’e la presija utiliza armas, tanba sira nia serviso la’os halo atuasaun, maibe identifika no investiga krime,” Deputado Mandati hateten.

Nia dehan, tuir lolos ne’e governo mobiliza deit Serviso Investigasaun Kriminal Nasional (SIKN) nian hodi halo serviso iha PCIC hodi nune’s la presija sosa tan.

“Kuando ema barak mak utiliza armas disifil ba ita atu kontrola, tanba ita nia kontituisaun RDTL fo dalan deit ba Polisia Nasional Timor-Leste (PNTL) no FALINTIL-Forsa Defesa Timor-Leste (F-FDTL) mak bele utiliza armas,” nia informa.

Tanba ne’e, nia husu ba governo atu hare didiak desizaun sira ne’e, atu nune’e ikus mai labele mosu situasaun ruma ne’ebe mak estado labele kontrola.

Entretanto, Ministro Justisa Manuel Carceres hateten, armas ne’ebe mak governo sosa hanesan pistola ba PCIC ne’e, liu husi desizaun ne’ebe aprova iha Concelho Ministros.

“Ita sosa pistola ba PCIC tanba sira la’os deit halo identifikasaun maibe bele halo atuasaun ba problema krime organizado. Ne’e labele ba liman mamuk deit,” MJ Carceres hateten.

Nia informa tan katak, antes governo deside hodi sosa pistola, governo tetu hotu ona kriteriu rigorozu hotu, tanba natureza PCIC nian atu kombate krime oin-oin.

Iha parte seluk Diretor Ezecutivo Fundasaun Mahein (FM), Joao Almeida hateten, governo tenke kria lei ida ne’ebe rigoroso hodi kontrola pistola sira ne’ebe mak sosa ba PCIC utiliza.

“Ita tauk deit utiliza sala, nia impakto mak sei hanesan kazu sira ne’ebe mak akontese iha Kulu-Hun iha tinan kotuk. Ita la koi atu akontese tan,” Diretor FM Almeida hateten.

Tanba ne’e nia dehan, parte governo tenke prepara mos kondisaun lei ruma oinsa atu bele regula utilizasaun kilat sira, atu nune’e membro sira labele utiliza tuir sira nia hakarak.