- Publika iha: 02 Outubro 2020
Polisia Nasional Timor-Leste (PNTL) liu husi komando munisipio Dili prende ona motorizada hamutuk 175 iha kapital Dili tanba komete infrasaun sira inklui halo sirkulasaun sem dokumento nune’e mos la kompleta asesorius motor nian, liga ba lei kodigo estrada numero 6/2003.
Sedundo Komandante Polisia, Superientendente Euclides Belo hateten, operasaun espefiku hodi halo cek point ba mivimento transporte publiku no privado iha Dili laran hodi kontrola dokumento nune’e mos aserorius sira hanesan lampo no espelho motor nian.
“Ita prende motor hamutuk 175 tanba balun la iha dokumento balun la kompleta asesorius motor nian hodi hamosu iregularidade iha kapital Dili,” nia hateten.
Nia dehan, depois de prende motorizada refere, komando mos atribui kedan tabela infrasaun ba infrator sira hodi ba selu iha banko depois bele ba foti fali objeto ne’ebe mak asegura iha komando Dili.
“Infasaun ne’ebe mak sira selu tuir hahalok krime ne’e mak sira halo exemplo dokumento la kompleto $45, asesorius la iha $35, nune’e mos Sim la iha $75,” nia hateten.
Nai dehan, nain ba motorizada sira ne’ebe balun konsege selu ona iha banko hodi foti fila sira nia motor, balun to’o agora seidauk ba foti.
“Ita husu ba publiku ne’ebe mak utiliza transporte hodi halo movimento iha kapital Dili, tenke kumpri lei sinais tranzito nian, nune’e mos tenke kompleta dokumento sira ne’ebe mak la iha, kuando la iha ami prende nafatin,” nia hateten.
Iha parte seluk, motorist Higinho Barganca rekoñese katak nia kontra duni lei tanba nia seidauk kompleta SIM motor tanba ne’e nia pronto selu multa iha banko hodi foti fila motor ne’ebe mak polisia prende ona.
“Montante ne’ebe mak hau selu hamutuk $75 tanba hau la iha SIM, no foti fila ona motor,” nia dehan.
Tanba ne’e nia dehan, hanesan sidadaun tenke hakruk ba lei sira ne’ebe mak implementa tanba ema hotu moris iha lei nian okos, kuando sala tenke rekoñese, no selu multa tuir duni resibu ne’ebe mak polisia sira oferese.