Quarta, Outubro 28, 2020
Total visitors: 530672

Xefe Estado Maior Jeral FALINTIL-Forsa Defesa Timor-Leste (F-FDTL), Major Jeneral Lere Anan Timur husu ba komandante Polisia Militar (PM) atu kontrola disiplina membro F-FDTL sira nian, tanba akontesiemnto balun membro sira halo problema iha komunidade, hemu lanu, halo perturba ordem publiku, no membro balun fasilita jogo ilegal, maibe la iha kontrolasaun no atuasaun husi PM sira nian.

Xefe Estado Maior Jeral FALINTIL-Forsa Defesa Timor-Leste (F-FDTL), Major Jeneral Lere Anan Timur husu ba komandante Polisia Militar (PM) atu kontrola disiplina membro F-FDTL sira nian.

Nia dehan, knar polisia militar nian primeiro kontrola disiplina iha militar nian laran nune’e mos bele tulun PNTL iha situasaun seguransa iha rai laran.

“Knar ida segundo ne’e ita hare bai-bain sira halo ona maibe, ida konaba kontrolasaun disiplina membro militar nian ne’e mak seidauk tanba ne’e ita husu komando polisia militar tenke kontrola militar sira ne’ebe mak kontra regras,” Jeneral Lere dehan.

Nia dehan, atu serviso ho profesionalismo tenke hatudo disiplina ne’ebe mak diak, atu bele manan konfiansa husi Estado no komando F-FDTL nian no husi povu rasik.

“Militar tenke iha disiplina ne’ebe diak. Sai ezemplo ba ema seluk, nune’e mos tenke hatene sai husi situasaun ne’ebe mak difisil,” nia salienta.

Tanba ne’e nia dehan, polisia militar tenke halo atuasaun ba militar se deit mak kontra regras, tanba ne’e husu ba membro hotu atu kumpri regras saida deit mak fo sai husi hirarkia komando F-FDTL nian.

Iha fatin hanesan, Komandante Unidade PM, Major Abel da Costa “NIKI” dehan, polisia militar presija kapasitasaun ne’ebe mak maximo hodi hala’o sira nia knar ho diak, nune’e mos presija tan rekursu hodi halo intervensaun ba problema ruma.

“Ita atu garante orden, disiplina, seguransa, infraestrutura, material no halo investigasaun ba membru F-FDTL tomak tuir lei, ita presiza rekursu maximo,” Maijor Niki informa.

Nia dehan, polisia militar mos hola parte seguransa ba entidade estadu Timor-Leste sira, nune’e mos apoio seguransa ba povu Timor-Leste iha situasaun perigo ba pertubrasaun seguransa interna no externa.

“Polisia militar, ita serviso hasoru osbtaklo oin-oin, no komando nafatin ejiji hodi hala’o nafatin serviso maske ita la iha ekipamentos, transporte, no ekipamento longistiku sira seluk, hodi apoio ita nia serviso,” nia hateten.

Maibe nia dehan, maske PM sira hasoru problema sira ne’e maibe sira nafatin pronto 24 horas hodi atende, situasaun problema sivil ka militar nian.

Iha parte seluk Diretor Fundasaun Mahein (FM) Joao Almeida hateten polisia militar ne’e nia funsaun atu kontrola ka halo atuasaun ba problema sira hotu ne’ebe membro iha instituisaun F-FDTL infrenta tanba ne’e mak hodi kria tan unidade polisia militar ne’e, maibe durante ne’e sira la halo funsaun lolos tanba menus konhesimento.

“Atu hala’o knar lolos ho profesionalismo membro sira iha unidade polisia militar tenke iha kapasidade maximo, investe iha formasaun espesifiku ezemplo hanesan atuasaun nia tenke iha formasaun taktika atuasaun nian maibe ita hare ida ne’e minimo liu durante ne’e,” nia hateten.

Nia dehan, tuir los atu garante membro militar sira serviso ho disiplina no hatudo profesonalismo tenke investe iha formasaun sira.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04