- Publika iha: 26 Outubro 2012
Ho difikuldade kona ba transporte ne’ebe durante ne’e Unidade Polisia Fronteira (UPF) hasoru hodi kontrola iha fronteira, hamosu lamentasoens husi Membru Parlamentu Nasional tanba kondisaun ne’e afeta ba sira nia sistema rotasaun ne’ebe ladun masimu iha baze.“Hau lamenta ho kondisaun ne’e, to’o agora sira laiha kareta ne’ebe sufsiente atu sira halo patrulamentu ho diak iha fronteira, hau husu deit ba Komandante Jeral sira no liu-liu Sekretariu Estadu Seguransa atu bele toma atensaun ba kondisaun ne’e, fo kondisaun kareta diak, tamba ita hare kareta butuk hotu iha Dili, nusa maka balun la oferese ba sira,” lamenta Deputadu Natalino dos Santos, iha Parlamentu Nasional.
Tanba tuir nia, atu UPF sira atu servisu ho profesionalismu, tenke iha fasilidade ne’ebe kompletu tanba knar UPF importante tebes hodi proteje nasaun Timor-leste husi ameasas husi liur.
Entretantu II Komandante Jeral Polisia Nasional Timor-Leste (PNTL, Komisariu Afonso de Jesus, rekonese katak durante ne’e UPF menus tebes kona ba transporte.
“Hau rekonese duni katak unidade ida ne’e infrenta problema barak kompara ho unidade sira seluk iha distritu sira, los duni katak deste inisiu to’o agora ne’e ita seidauk aloka transporte ida ne’ebe ke proprio ba sira, atu halo rotasaun,” dehan Komisariu de Jesus.
Alende ne’e iha mos kestaun balun maka sira infrenta maka sira seidauk iha edifisiu ne’ebe maka propio. “Ami fiar katak ho sira nia lamentasaun hirak ne’e bele fo hanoin ba Governu, para oinsa bele esforsu hodi tau matan ba sira,” dehan Komisariu ne’e.