- Publika iha: 26 Outubro 2012
Membru Polisia Nasional Timor-Leste (PNTL) ne’ebe maka involve iha krime ruma, se laiha oportunidade atu hetan promosaun extra ordinariu ne’ebe husi Komisaun Promosaun Divizaun Extra ordinariu hala’o ba.“Ami esplika ona situasaun ne’e ba sira, prosesu tranzitoria ne’ebe maka hala’o iha 2008, ne’e difirente ho prosesu Promosaun Extra ordinariu. Ita fo oportunidade ba membrus PNTL hotu-hotu tuir maske sira iha hela kazu disiplinar no krime sira bele tuir, maibe Promosaun Extra ordinariu diferente no hateten tiha ona katak ba membrus PNTL ne’ebe maka sei komete iha kazu disiplinar no krime ruma, sira sei la tuir,” esplika Segundu Komandante Jeral PNTL, Komisariu Afonso de Jesus, foin lalais, iha Kaikoli, Dili.
Komisariu ne’e dehan, wainhira kazu ne’ebe sira komete ne’e taka ona iha Tribunal no inflasaun disiplinar taka ona, ne’e sira bele tuir.
Komisariu de Jesus informa, atu tuir ba promosaun ne’e ba membrus hotu-hotu tenke hatama sira nia dokumetus aplikasaun atu kompete ba promosaun ida ne’e, no husi Prezidente Promosaun Extra ordinariu sei halo selesaun ba dokumentus hirak ne’e.
“Atu hatene sira ne’e sei iha prosesu krimi balun ka la’e, Prezidente Promosaun sei haruka dokumentus ne’e ba iha Servisu Investigasaun Criminal hodi hare karik naran sira ne’e balun, sira nia prosesu kazu sei la’o hela no sei haruka mos ba iha Prokurador Jeral, no sei haruka mos ba iha Tribunal atu buka hatene,” dehan Adjuntu Afonso.
Iha parte seluk Deputadu David Diaz Ximenes apoia katak, membru PNTL ne’ebe maka involve iha krime labele hetan Promosaun Extra ordinariu.
“Ne’e labele, tenke ema ne’ebe maka mos husi krime maka bele hetan promosaun ne’e,” apoia Deputadu Ximenes.
Tanba ne’e nia sujere ba Komisaun Promosaun Extra ordinariu ne’e, atu hare didiak kestaun ne’e.