- Publika iha: 15 Outubro 2012
Polisia Komunitaria (PK) halo reuniaun ho lideransa lokal sira kona ba involvementu komunidade iha programa ne’ebe sira sei hala’o iha komunidade sira nia le’et, nune’e bele koperasaun diak entre sira.“Ami halo reuniaun ho lideransa komunitaria sira, atu oinsa mak bele influensia komunidade sira bele tuir ami nia programa hirak ne’ebe ami halo, hanesan ami sempre halo animasaun, halo konsertu muzika ba komunidade sira, e ami mos halo vizita ba eskola sira hodi sosializa papel ami nian iha sosiedade nia le’et, atu sira mooos iha konesementu,” dehan Komandante Departementu PK, Superintendente Boavida Ribeiro, iha Kaikoli,Dili.
Tuir nia, atividade hirak ne’e sira hala’o ona iha Distritu 13 nia laran no hetan partisipasaun masimu husi komunidade inklui lider komunitaria sira.
“Sira gosta atividade ne’e no ami halo iha tinan barak ona, no agora ami kontinua nafatin, maibe dalaruma iha difikuldade kona ba orsamentu no material sira,” Komandante ne’e tenik.
Tanba ne’e nia espera katak, iha diskusaun Orsamentu Jeral du Estadu (OJE) 2013 nian, bele tau mos ba Polisia Komunitariu nian, nune’e bele hala’o atividade ne’ebe integradu ho komunidade sira iha baze.
Iha lidun seluk tuir Deputadu Mateus de Jesus katak, prezensa Polisia Komunitaria iha komunidade nia le’et ne’e importante tebes, e sira mak hatene liu kondisaun komunidade nian iha baze.
“Oinsa maka ita husu komunidade nia kontribuisaun, maibe ita rasik la besik ba sira, ne’e duni saida maka Polisia Komunitaria halo ne’e iha valor positivu ida,” dehan Deputadu Jesus.
Tanba ne’e Deputadu ne’e husu ba governu atu tau orsamentu ba sira nia departementu, nune’e sira bele hala’o sira nia atividade ho diak no besik liu ho povu.