- Publika iha: 03 Outubro 2013
Durante halao’o Monitorizasaun iha tinan 2013 ne’e, Organizasaun Naun Governamental (ONG) Nasional Judicial System Monitoring Program (JSMP) identifika iha tipu kazu hat mak domina iha Tribunal Distrital Hat iha rai laran.
Tuir Director Ezekutivu JSMP, Luis de Oliveira Sampaio, hahu Janiero to Julhu 2013, kazu sira ne’ebe maka tama barak liu iha Tribunal Distrital hat ne’e mak Violensia Domestika, Omisidio (oho malu), Ema Nauk Sasan, no Estraga Sasan.
“Kazu violensia domestika barak tama ne’e diak, tanba ema komesa sadar ona katak violensia domestika ne’e hanesan krimi publiku, entaun ema komesa denunsia ou halo ona keixa” dehan Director Sampaio, iha nia knar fatin foin lalais.
Nia mos dehan alende tipu kazu hat ne’e,iha mos kazu seluk hanesan asaltu fisiku, maibe nia volume ladun boot, no kompara kazu sira ne’e iha tinan kotuk, tinan ne’e iha mudansa.
“Hanesan kazu nauk ten no estragasasan, no omesidio,ne’e iha tinan kotuk barak maibe iha tinan agora komesa menus ona. Iha duni maibe ladun barak ona,” dehan Director Sampaio.
Nia haktuir tan katak kona ba kazu violensia domestika, ne’ebe volume a’as iha 2012, iha 2013kontinua sai a’as nafatin.
Iha lidun seluk Deputadu Eladio Fakultu hateten konaba kazu Violensia domestika ne’ebe maka nia volume a’as iha tribunal kompara ho kazu seluk, ne’e presija fo atensaun.
“Vitima violensia domestika hato’o kazu ne’e iha tribunal, ne’e nudar asaun diak tanba konsidera ona katak violensia domestika ne’e nudar krimi publiku, maibe Governu nia knar atu bele hasae liu tan konsensia komunidade atu bele evita krimi ne’e buras” dehan Deputadu Eladio Fakultu.
Nia mos declara katak, konaba kazu omesidio, estraga sasan, no nauk sasan, asaltu fisiku, ne’e nudar kazu normal ne’ebe maka akuntese mos iha rai seluk, maibe ne’e la signifika katak la presija tau atensaun.
“Hanesan ekonomia ladun diak, bele obriga ema halo asaun sira hanesan ne’e, tanba ne’e sistema politika tenke diak, atu bele povu ne’e beleses an husi hahalok sira ne’e.”