- Publika iha: 12 Setembro 2013
Komisaun Investigasaun Independente dadaun ne’e pronto ona atu lori relatoriu investigasuan nian kona ba kazu membru PNTL baku Deputadu Manuel Castro ba Parlamentu Nasional.
Sekretariu Estadu Asuntu Parlamentar (SEAP), Maria Terezinha Viegas, hateten Komisaun Investigasaun Independente (KII) hala’o ona investigasaun ba kazu ne’e durante fulan ida no agora preparadu.
“Relatoriu prontu ona, maibe sei enkaminha uluk ba Primeiru Ministru nudar Ministru Defeza no Seguransa atu haree, molok hato’o ba deputadu sira,” SE Viegas dehan, iha Parlamentu Nasional.
Nia hateten, komisaun ne’e involve husi entidade lubuk ida ne’ebe halo investigasaun ba kazu ne’e ho independente.
Akontesementu ne’e rasik akontese iha Audian, Dili, iha fulan hirak liu ba, iha ne’ebe membru Task Force sira halo atuasaun brutal (baku no hatete liafuan at) ba Deputadu Manuel Castro
Entretantu Deputadu Manuel Gaspar Soares da Silva husi bankada Fretilin, hateten bankada la kestiona ba individu, maibe prosesu investigasaun la’o ona iha polisia nia laran.
“Ami ejiji ba membru PNTL ne’ebe halo atuasaun hasoru kolega deputadu ne’e, tenke responsabiliza tuir eviidensia mak determina iha relatoriu ne’e,” Deputadu da Silva dehan.
Iha sorin seluk komunidade Audian,Manuel da Silva ne’ebe mak hare ho matan rasik ba akontesemntu ne’e hateten,membru Polisia Task Force balun tuku husi kotuk kona duni deputadu ne’e.
“Iha momentu ne’e ami barak mak iha ne’e, polisia sira baku no tuku deputadu ne’e,” testamunha ne’e dehan.
Komunidade ne’e konta kronolozia ba kazu ne’e deputadu Castro hetan baku husi Polisia tanba Joven ida nebe mak servisu iha Kompanha China halo dosi iha Lacky Cacke Hause 88 Stadiu oin Polisia baku dolar depois deputadu ne’e rona husi uma halai sai ba hapara tanba ne’e mak oknum Polisia balun tuku fali deputadu ne’e husi kotuk no balun trata deputadu ne’e.
“Vitima ne’e ema Oecuse nebe mak hela iha kotuk servisu iha 88 ne’eba,”da Silva hato’o.
Akontesimentu ne’e akontese iha Xesta fulan kotuk mais ou menus tuku sia ho balun (31/05/2013).
Wainhira TDW tenta konfirma asuntu ne’e ba iha Sekertariu Estadu Siguransa maibe,Skretariu Estadu Siguransa,Francisco Guteres la kohi fo komentariu ba asuntu ne’e.