- Publika iha: 11 Setembro 2013
Diretor Fundasaun Mahein, Nelson Belo, sujere ba Polisia Nasional Timor-Leste atu bele hasa’e tan volume patruliamentu iha tempu kalan, nune’e bele asegura tentative krimi organizadu ruma ne’ebe bele mosu iha rai laran. 
Diretor Belo, diskunfia katak krimi organizadu dadaun ne’e iha duni iha rai laran, liu-liu iha capital Dili.
“Ezemplu, hadau osan ka asaltu ema nia sasan, violasaun seksual ho tan omesidu ka oho. Violasaun seksual ho tipu ‘game rape’,” Diretor Fundasaun Mahein (FM), Nelson Belo dehan, via telephone.
La’os ne’e deit, nia hatutan, iha mos kazu seluk ne’ebe akontese tanba seguransa la la’o.
“Ezemplu, hanesan akontese kazu violensai seksual akontese ba feto ida iha Embaixada Amerika nia oin, ne’ebe maka halo husi taxista balun. No foin dadauk akontese iha Tasi Tolu, obriga feto ida ho mane ida halo relasaun seksual ne’ebe uja ba filmagem nian,” Diretor Belo katak.
Tanba ne’e nia husu ba polisia, atu bele hasa’e volume patruliamentu iha tempu kalan no loron, liu-liu ba fatin sira ne’ebe maka dala ruma sai risku atu ema halo asaun sira ne’e.
Iha lidun seluk Deputadu Mateus de Jesus, hateten, polisia halo duni sira nia knar ho diak, maibe kondisaun balun ne’ebe maka karik bele obriga ema atu halo krimi no involve iha krimi organizadu sira ne’e.
“Durante ne’e ita seidauk identifika lolos katak krimi oganizadu iha duni ga la’e, maibe ne’e knar polisia nian atu mantein seguransa ba ema hotu,” Deputadu de Jesus katak.
Iha fatin seluk Komandante Polisia Nasional Timor-Leste (PNTL), Komisariu Longuinhos Monteiro, hateten, polisia nia knar maka hala’o patruliamentu, vizilansia iha tempu kalan no iha mos sistema organizasaun ida ke wainhira iha emergensia bele bolu.
“Iha mundo tomak polisia la la’o iha taxi laran no la hela iha ema idak-ida nia uma, maibe iha nia estasaun no iha nia fatin. Wainhira iha samada de emergensia balu, ne’ebe la’os dehan polisia faila ne’ebe hamosu krimi,” Komisariu Monteiro katak.
Nia hatutan, durante ne’e polisia hala’o duni sira nia knar iha baze ho diak, karik iha vitima balun nebe maka sente nia hetan violasaun ruma, bele informa ba iha polisia.
“Husu para komunidade labele involve ba hahalok sira ne’ebe bele destroy nasaun ne’e,” Komisariu Monteiro apela.