- Publika iha: 09 Setembro 2013
Komunidade area fronteira ne’ebe nudar mos Advogadu Privadu, Bendito dos Santos preokupa tebes ho kondisaun servisu Unidade Polisia Fronteira nian, tanba to’o agora sira sei menus fasilidades servisu.
Nia dehan, servisu Polisia Fronteira (UPF)ne’e importante tebes, hodi garante seguransa iha fronteiras, tanba ne’e governu presiza toma atensaun ba sira.
“Sira laiha kareta no radio komunikasaun.Hau hare polisia sira atu ba aldeia sira halo patrula, sira la’o deit no la’o lubuk ida,” dos Santos preokupa, iha Timor Plaza, Dili.
Tanba ne’e, nia hatutan, bainhira governu husu atu polisia sira tenke servisu ho professional ismu no ho seriedade, tenke apoia mos fasilidades ne’ebe sufsiente.
Entretantu Deputadu Mateus de Jesus, dehan kestaun ne’e dalabarak ona sira levanta iha plenaria, maibe to’o agora laiha rezultadu.
“La’os ne’e deit, hau mos rona informasaun husi eskuadra sira iha distritus, problema seluk ne’ebe sira infrenta mak laiha lampra atu leno bainhira halo operasaun iha tempu kalan,” Deputadu de Jesus kestiona.
Deputadu ne’e espera, katak maske nenein maibe governu bele resolve problema sira hanesan ne’e, nune’e UPF sira iha fronteira bele hala’o sira nia servisu ho diak no efikas liu tan.
Hatan ba preokupasaun hirak ne’e, Komandante Jeral Polisia Nasional Timor-Leste (PNTL), Komisariu Longuinhos Monteiro, katak sira la’o tuir sira nia planu kada tinan tuir orsamentu ne’ebe iha.
“Maibe ita mos komprende katak, governu la’os resposta buat hotu-hotu inklui fasilidade polisia nian, orsamentu ne’ebe iha ita tenke jere to’o ka la to’o tenke to’o tinan ida,” Komandante Monteiro dehan.
Nia dehan, karik tinan ida ne’e la hetan, tinan oin hetan, konserteza katak faltas sira ne’ebe maka iha ne’e sei responde hotu.