- Publika iha: 13 Março 2012
Tuir Administrador Ospital Nasional Guido Valdares (HNGV), Rui Manuel Gago Exposto katak total orsamentu ne’ebe aloka ba iha konstrusaun mortuario ne’e hamutuk US$ 800.000 husi Orsamentu Jeral du Estadu (OJE) 2009 nian.
Tuir Exposto, Ministeriu Saude (MS) entrega mortuariu ne’e ba iha HNGV kleur ona maibe la uza tanba seidauk hetan bensaun.
“Mortuario foun ne’e alende uza ba prosesu autopsia maibe mos sai fatin ba Departamentu Forensik para kazu ne’ebe ho relasaun forensic bele fo asistensia iha ne’eba tanba ita hare katak kondisaun mortuario tuan ne’ebe ita iha ne’e la’os ona atu uza hanesan mortuario tanba ho kondisaun aat entau ami hanoin fali harii mortuario ho departamentu forensic iha laran hotu,” esplika Diretor Exposto, semana kotuk (13/02) iha nia knar fatin Bidau Toko Baru, Dili.
Fatin Mortuariu ne’e rasik fo bensaun husi Amo Bispo Diocese Dili, Dom Alberto Ricardo da Silva iha selebrasaun loron mundial ema moras nian iha 11 de Fevereiru, Administrador Exposto dehan.
Nia hatutan, konstrusaun mortuariu foun ne’e tama iha planu orsamentu 2009 nian maibe remata iha 2012 tanba fasilidade ne’ebe limitadu.
Tuir Administrador Exposto mortuariu foun bele akumula mate sira husi Distritu hotu ne’ebe mate ho kazu no bele rai mate isin hamutuk 36 kadaveres.
Iha oportunidade hanesan Diretora Jeral HNGV, Doutora Odete da Silva Viegas, katak mortuariu ne’ebe tuan iha fasilidade ne’ebe limitadu no difisil atu akumula mate sira husi Distritus tanba ne’e MS liu husi Diresaun HNGV harii tan mortuariu no forensic foun ida ho nia kapasidade ne’ebe sufsienta.
“Ohin loron relasiona ho selebrasaun loron mundial ba moras ami hakarak husu ba Bispo atu fo bensaun ba Mortuario foun ne’ebe ita iha tanba ita hotu hatene katak ita nia mortuario tuan ho kapasidade ne’ebe limitadu ho seis kamas deit entau ami labele akomula mate sira mai husi parte hotu-hotu,” dehan Doutora Viegas.
Nia parte espera katak ho fasilidade foun ne’ebe iha, HNGV sai hanesan ospital do ensino ne’ebe agora dadaun halao dadaun ona.
Maske nune’e, tuir Diretora Viegas katak sira sei iha difikuldade kona ba rekursu umanu tanba iha deit pesoal nain rua no doutor nain ida mar servisu iha mortuariu foun ne’e entaun difisil ba sira atu fo asistensia ba mate sira ne’ebe tama iha fatin ne’e.