- Publika iha: 13 Março 2012
Tuir Bispo Diocese Dili, Dom Alberto Ricardo da Silva katak, servisu ho porfesionalismu doutores no emfermeirus sira nian iha valor bo’ot tebes no nia folin klean no naruk tebes kompara ho servisus sira seluk tanba salva ema nia vida.
“Ita reza no husu tulun mos ba Nai Maromak ba ita nia doben doutores no emfermeirus, responsavel, directores sira hotu ne’ebe tau matan ba maluk sira ne’ebe sofre moras oi-oin iha ita nia rai,tanba sira nia servisu valor bo’ot tebes no sira oferese mos sira nia servisu ba Nai Maromak nudar karidade ida bele halo santo no salva sira nia familia no maluk sira ne’ebe moras nune’e ita hotu reza ba sira ne’e hotu,
” dehan Bispo Dom Ricardo, iha nia omilia bainhira diriji misa iha selebrasaun loron mundial ema moras nian, 11 Fevereiru, iha Hospital Nasional Guido Valdares (HNGV), Bidau Tooko Baru Dili.
Bispo dehan, rai Lourdes naran bo’ot iha mundu nudar fatin peregrinasaun, ema hotu bele ba iha fatin ne’eba reza no halo sakrifisiu atu muda sira nia vida ba diak hakribi sira nia sala no husu tulun ba sira nia familia, sira nia rai no sira n’eebe moras entau loron ne’e hili sai loron mundial ba moras ne’e los tanba presiza entrega ema moras sira hotu ba inan doben nain feto para nia tau matan, kuidadu no salva entau ema hotu tenke hakiak no dezenvolve devosaun Nain feto nian reza lor-loron.
“Dia 11 de Febreiru ema hotu iha mundu tomak selebra loron Nain Feto Lourdes ou Nossa Senhora Lourdes nian loron hodi hanoin hikas fali Nain Feto Virgin Maria mosu ba Bibi atan feto oan ida iha rai Lourdes iha nasaun Fransa (Europa) no loron ne’ e mos fo hanoin fila-fali ita atu hanoin hikas Virgen Maria funu hasoru demonio no manan demonio hodi tahan ita defende no salva ita,” nia katak.
Tuir Bispo Ricardo katak, agora dadaun iha sensia teknologia moderna, halo programa avansa maka’as maibe seidauk bele hamenus sofrementu iha mundu tanba ema barak mak iha mundu liu-liu iha Timor-Leste sei terus ba moras ne’ebe sira hetan, presiza tebes ema barak nia tulun.
“Ema ne’ebe fiar ho laran metin ba Nai Maromak, la lakon esperansa nia sei la terus mesak no nia sei sente kma’an no sente katak Nai Maromak fo folin no valor ba nia sofrementu,” Bispo dehan tan.
Entretantu Diretora Jeral HNGV, Doutora Odete da Silva Viegas, hateten kada tinan ospital selebra loron especial ida ne’e atu hanoin hikas sira nia knar no sai hanesan loron importante ida ba sira nia knar nudar pesoal saúde.
“Iha loron ida ne’e ami mos hakarak informa ba Bispo no entidade tomak katak selebrasaun tinan ida ne’e diferente ho tinan kotuk tanba tinan ida n’ee HNGV infrenta problema no dificuldade hanesan ita hotu hatene katak moras dengue ne’ebe oras ne’e numeru sa’e makas,” dehan Dra. Viegas.