- Publika iha: 13 Março 2012
Tanba falta de sala baixa, pasiente ho moras dengue tenke okupa sala enkontru no sala CT-Scan e kondisaun ida ne’e obriga Konselhu Diresaun Ospital Nasional Guido Valadares (HNGV) halo enkontru iha koridor.“Maske enkontru importante, liu-liu enkontru kona ba kazu sira hanesan moras dengue, maibe ami tenke buka fatin seluk hanesan fatin koredor la problema maibe pasiente mak labele husik iha sala koredor tanba ne’e anin kona, se enkontru urgente ruma ami uza fatin seluk hodi hala’o ami nia enkontru lor-loron e pasiente tenke uza sala enkontru nune’e sira mos bele sente diak bainhira halo tratamentu,” hateten Administrador HNGV, Rui Manuel Gago Exposto, semana kotuk (13/02) iha nia knar fatin Bidau Toko Baru Dili.
Tuir nia, iha sala pedeatrira numeru un ho dois iha kama 64 maibe tanba moras kada loron aumenta maka’as entaun laiha ona tempu atu harii tan sala urgente tanba pasiente sira ne’ebe tama iha sira ne’e mai ho moras dengue.
“Ne’e prerigoju tebes e labele hein halo sala urgente tanba ne’e konseilho diresaun deside tau pasiente iha sala enkontru HNGV no Sala CT-Scan hodi halo observasaun ba kondisaun pasiente, iha sala enkontru iha 19 kamas no ST-Scan iha 11 kamas agora dadaun nakonu hotu,” nia informa.
Enkuantu total pasiente ho moras dengue ne’ebe agora baixa hela hamutuk 179 pesoas, maioria labarik no nain tolu mak mate ona.
Nia informa katak kama ba pasiente atu baixa tuir standar ospital nian hamutuk 264 kamas maibe agora aumenta ba iha 325 kamas nakonu hotu ho situasaun ida hanesan ne’e kamas sira ne’e la sufsiente atu pasiente sira uza.
Entretantu Diretora Jeral HNGV, Odete da Silva Viegas hateten problema ne’ebe agora dadaun Hospital nasional hasoru mak ema hotu hatene konaba moras deque n’eebe numeru sae makas sai prekupasaun bo’ot ne’ebe HNGV hasoru maibe sira sei buka atu kopera hamutuk hodi bele fo asistensia nafatin ba moras sira ne’ebe hakbesik an ba iha ospital nasional.
“Tinan ne’e diferente ho tinan kotuk tanba enfermagen ne’ebe ami normalmente utiliza, ami uza mos sala enkontru no sala CT-Scan atu bele akumula moras hotu ne’ebe mai iha ospital ida ne’e,” nia dehan.
Tuir nia, ho limitasaun ne’ebe iha sira labele halo buat barak maibe ho kontribuisaun no kolaborasaun husi entidade hotu espera katak bele redus numeru moras sira ne’ebe agora dadaun afeta maka’as ba kondisaun labarik sira nia saude.