Estudante Analista ida mate Iha Indonesia tanba hetan asidente

Estudante Timoroan ida husi Departamentu Analista ne’ebe halao nia estudu iha Institutu Uiata Bakti Kediri Indonesia (Jawa Timur) hetan asidente iha Domingo (22/1) dader tuku 9:00 no mate tanba hetan kanek todan, no kolega ida seluk tama iha Hospital Kediri Indonesia tanba hetan kanek Kaman deit.

“Sim estudante ne’e husi Departamentu Analista. Akontesementu ne’e akontese iha Domingu dadersan tuku 9:00. Sira atu ba tuir Missa entau sira nain rua, Mateus (matebian), ho nia kolega Timotio ho motor to’o iha dalan klaran sira hetan dezastre soke.

Tanba ne’e rezulta ida mate ida seluk kanek agora baixa hela iha Ospital Kediri Indonesia,” dehan Director Nasional Rekursu Humanu Interino, Ministerio Saúde (MS), Duarte Araujo, semana kotuk (25/1) iha edifisio MS Kaikoli, Dili, bazeia ba informasaun ne’ebe sira hetan husi estudantes balun iha Jawa Timur.

Nia dehan tuir informasaun ne’ebe MS hetan katak nia Mateus (Matebian) laos mate iha fatin akontesementu maibe sira lori nia ba iha ospital maibe lakonsege salva no to’o iha Ospital matebian is kotu ona tanba matebian hetan kanek todan iha ulun. Fain trajedia mos akontese iha fatin ne’ebe do’ok husi ospital.

Diretor Interino Araujo hatutan liu tan katak konaba prosesu mate isin lori mai to’o iha Timor ne’e responsabilidade governu nian, ne’eduni governu hatama ona proposta ho osamentu US$3 mil ba transporte hodi mate isin husi Kediri Indonesia (Jawa Timur) mai Timor–Leste, no sei evakua to’o iha matebian nia moris fatin iha Oe-cusse. Konaba serimonia funeral MJS sei ajuda familia matebian ho $5.000.

Matebian Mateus ho nia kolega seluk sira arranka ba iha Indonesiaiha dia 4 de Dezembru hamutuk sira nain 100 atu hasae kapasidade no profesionalismu tekniko Laboratorium durasaun tinan tolu, Tecniku Farmasista ho durasaun tinan tolu mos no Medisina Dentaria ho durasaun tinan lima.

TDW koko atu konfirma asuntu ne’e ba iha reprezentante povu iha parlamentu liu-liu husi Komisaun F ne’ebe trata asuntu konaba Saúde, maibe Deputado Francisco Jeronimo la koi fo komentario tanba nia rasik seidauk hetan informasaun husi parte MS.