- Publika iha: 13 Fevereiro 2012
Relasiona ho keisa ne’ebe iha katak estudante hamutuk 100 ne’ebe hetan bolsu estudu husi Ministerio Saúde (MS) atu ba halo estudu iha Kediri Indonesia Jawa Timur konaba tekniku Farmasista, Tekniku Laboratorio no Medisina Dentaria, ida labele halo kontinua ba nia estudu tanba hetan problema ho matan bainhira halo ezame mediku husi Indonesia, ho ida ne’e Membru Parlamentu Nasional, Deputado Francisco Jeronimo, husu ba MS atu fo atensaun ba ezame medikus bainhira estudante aranka ba liur tanba ne’e relasiona ho dignidade no mos ho gasta ossan ba estudante ida-idak atu bele partisipa.
“Teste sira hanesan ne’e kompetensia Ministerio nian entau hau husu ba Ministerio atu tau atensaun ba kazu sira ne’e no hare didiak halo analiza didiak katak hare ema ne’ebe lolos duni atu ba iha ne’eba labele hare ema ne’ebe ita kuinese entau haruka ba deit ne’e bele kria konplikasaun iha ne’eba tanba se hetan problema hanesan ne’e ita mak moe tanba la tuir kriteria ne’ebe ema fo entau ema haruka fila,” dehan Deputadu Jeronimo, semana kotuk (25/1) iha Parlamentu Nasional, Dili.
Nia hatutan katak atu labele akontese tan kazu sira hanesan ne’e MS tenke halo ezame medikus ho didiak no prepara ho didiak nune’e labele iha tan konplikasaun iha futuro tanba ida ne’e konpetensia MS nian.
Iha parte seluk, Director Nasional Rekursu Humanu Interino, MS, Duarte de Araujo, hateten katak iha tempu ne’eba estudante ne’ebe aranka iha dia 4 de Dezembru 2011 ne’e ema nain 100 atu halo estudu iha Instituto Uiata Bakti Kediri iha Indonesia Jawa Timor maibe to’o iha ne’eba nain ida la bele halo kontinuasaun ba nia estudu konaba tekniku farmasista tanba hetan problema ho matan, nia parte mos la komprende konaba kazu ne’e.
“Iha tempu ne’eba sira ne’ebe hetan bolsu estudu ne’e hamutuk 100 maibe to’o iha Indonesia ema halo teste mediku foin fali iha ida mak la kiu katak labele kontinua nia estudu iha teknika farmasista tanba problema ho matan, entau muda fali iha Medikal record katak oinsa atu halo relatorio iha Sentru Saúde. Iha momentu ne’eba ami buka ida hodi taka ona,” dehan Director Interino Araujo.