- Publika iha: 13 Fevereiro 2012
Relasiona ho asidente ne’ebe rezulta estudante tekniku analista ida mate Ministerio Saúde (MS) seidauk bele identifika estudante ne’ebe atu troka matebian Mateus nia fatin atu tuir estudu iha institute Uiata Bakti Kediri Jawa Timor Indonesia tanba sei iha prosesu funeral nia laran.
“Ami seiduak hanoin atu buka fali estudante ida atu troka nia fatin tanba agora dadaun sei iha serimonia tristeza nia laran tanba ne’e sei hanoin fali bainhira mate isin iha ona fatin hakmatek foin ami bele hanoin fali se mak atu troka karik semana rua oin mak ami hare fali se mak bele troka nia,” dehan Director Anasional Rekursu Humanu Interino, MS, Duarte Araujo, semana kotuk (25/1), iha edifisio MS, iha Kaikoli, Dili.
Nia hatutan katak ema ne’ebe atu troka matebian ne’e sira ne’ebe uluk liu ona prosesu rekrutamentu maibe la konsegue ba no sei lahalo tan rekrutamentu tanba sira ne’ebe uluk pasa rezerva sei iha no se sira pronto atu troka bele troka deit.
“Sira ne’ebe pasa rezerva sira mak iha direitu atu troka matebian nia fatin no tenke husi Distritu Dili no tekniku analista tanba matebian hetan jata husi distritu Dili husi Sentru Saude Becora. Se sira pronto atu troka no ho valor ne’ebe diak ami sei organiza sira hodi haruka ba eskola no nia mak iha direitu atu hetan subsidiu,” dehan Director Interino Araujo.
Nia hatutan liu katak maske seidauk identifika estudante ne’ebe atu troka matebian nia fatin maibe MS tenke buka duni ema atu prense fatin ne’e tanba governu Timor-Leste selu ona instituisaun ho numeru estudante hamutuk 100.
Iha parte seluk, estudante Rozantina Da Costa hateten katak MS tenke identifika lalais estudante ne’ebe atu troka matebian Mateus se lae estudante ne’ebe atu troka ne’e nia bele tarde atu asesu ba materia tanba estudante sira ne’e ba fulan ida liu ona entau labele demora tan tempu.
“Nudar estudante ami husu ba Ministerio Saúde atu identifika lalais ema ne’ebe atu prense matebian nia fatin. Se troka tarde nia bele sente ganjil bainhira ba estuda hamutuk sira ne’ebe aranka uluk iha dia 4 de Dezembru tanba materia ne’ebe nia tuir ne’e iha klaran ona,” dehan Estudante Da Costa.