- Publika iha: 31 Janeiro 2012
Hare ba situasaun real ne’ebe komunidade iha baze enfrenta katak susar atu asesu ba Edukasaun no Saude tanba ho kondisaun estradas ne’ebe la foravel ba komunidade sira liu-liu komunidade iha Uailalika, Distritu Viqueque, susar atu asesu ba Sentru Saude ruma tanba dok.
“Ami komunidade Uailalika husu ba ministeriu kompetente, Ministeriu Saude atu loke tan sentru saude ida iha Bairo Uailalika tanba iha tempu uluk Uailalika iha sentru Saude agora laiha. No ami preokupa tanba mota laiha ponte entau to’o iha Ospital Darbai tarde entau
inan partu sira sai vitima no labarik sira barak ona mate tanba to’o tarde iha ospital Darbai,” dehan komunidade Manuel da costa Amaral, semana kotuk (19/1) iha sub-distritu Uatolari distritu Viqueque.
Nia hatutan katak komunidade iha Uailalika susar tebes atu asesu ba Sentru Saude tanba komunidade atu ba iha Sentru Saude Darbai dok kuaze kilometru hitu no ba Sentru Saude Uatolari Atas dok ho kilometru walu ne’e duni komunidade iha Uailalika difisil atu hetan asesu ba Sentru Saude ruma.
Iha lidun seluk, komunidade Abilio Pinto konkorda ho nia kolega katak sira presiza tan Sentru Saude ida iha sira nia bairo Uailalika, alende eskola, tanba dalabarak inan isin rua sira mate tanba hela dok husi ospital no difisil atu asesu ba Sentru Saude nune’e mos impaktu husi estrada ne’ebe aat no ponte ne’ebe monu seidauk hadia mota tun entau sira labele ba iha Sentru Saude.
“Atu redus mortalidade inan ho oan ami komunidade Uailalika husu ba governu atu harii Sentru Saude ida iha ami nia bairo no husu ba governu kompetente atu hadia ami nia estrada no ponte ne’ebe monu kleur ona maibe to’o agora seidauk hadia,” dehan komunidade Pinto.