- Publika iha: 31 Janeiro 2012
Eskola Publika (EP) 10 Dezembru iha Comoro, Dili, agora daudaun falta fasilidade hanesan kadeira no meza no dificuldades hirak ne’e halo prosesu aprendizajen ba estudante EP 10 Dezembru la adekuado.
Diretor Adjuntu EP 10 Dezembru, Amandio Freitas, apela ba governu hodi tau matan mos ba eskola ne’e.
“Kalaru ke eskola ne’e menus fasilidade, primeiru laboratorio ne’e laos akuntese deit iha ami nia eskola maibe hau hanoin eskola iha teritoriu tomak ne’e seidauk iha laboratorio. Laboratorio ne’e ita persija tanba materia ne’e ita persija laboratorio.
Segundu livrus ba alunus, terseiru kadera no meza “ dehan Diretor Adjunto Freitas nudar semana kotuk (18/1).
DA Freitas hatutan mos katak, EP 10 Dezembru nia estudante hamutuk liu mil alunos no falta fasilidade sei fo impaktu ne’ebe mak ladiak ba estudante sira nebe maka tama ona iha eskola ne’e.
“Dala ruma prosesu aprendijazen lao ladun normal, tanba kadabes estudante nain 2 tur iha kadeira 1 deit. Mesmu kondisoens ladun subsiente tanba falta de fasilidade maibe nafatin iha konsensia husi profesora no estudante atu nafatin halao prosesu aprendijazen.”
Maibe falta fasilidade hanesan livru atu hanorin signifika katak professores sira lori deit sira nia esperiensia rasik no uza deit teoria nomos hatudu deit objektu ba alunus sira no la iha oportunidade ba sira atu vizualiza rasik.
Entretantu Deputado Fransisko Da Costa Jeronimu, Parlamento Nasional, Komisaun F sujere ba governu atu hare’e no desidi kona ba prioridade said mak tenki resolve uluk no buka atu hadia ne’ebe molok hare’e ba prioridades seluk.
“Hau nia hanoin Governu tenki fo prioridade ba buat nebe mak persija uluk. Kuandu hakarak tinan ida ne’e atensaun ba kadeira meja entaun tau atensaun ba kadeira meza. Tau atensaun ba livru sira, sira ne’e hotu tia maka tau atensaun fali ba sira seluk, labele ohin ida, aban ida, ne’e la rezolve problema” dehan Deputado da Costa.
TDW koko atu konfirma assuntu ne’e ho Director Nasional Infrastutura Educasaun Almeiru Soares, maibe Director ne’e laiha disponivel atu fo sai deklarasaun ruma ba media.