- Publika iha: 31 Janeiro 2012
Moras Dengue, moras ne’ebe perigosu tebes ba labarik no adultu sira komesa buras ona iha Capital Dili laran hanesan iha Hospital Nasional Guido Valadares agora dadaun rejistu ona kazu moras dengue hamutuk 30.
“Iha tinan 2012 kazu moras Dengue hamutuk 30 tama ona iha Hospital Nasional Guido Valadares (HNGV) alende HNGV iha ospital Manatutu mos rezistu ona kazu Dengue tanba agora dadaun ita tama ona iha tempu udan entau fasil atu hetan moras dengue no
malaria. Maibe situasaun hotu sei lao diak tanba ita nia professional saude sira preparadu ona ho esperensia ne’ebe bo’ot tebes. Fasilidade saude sira mos preparadu ona hanesan stok aimoruk ne’ebe to’o mai dadaun ona,” dehan Ministru Saude, Nelson Martins, iha semana kotuk (17/1) iha HNGV Bidau Toko Baru, Dili.
Ministro Martins hatutan katak Ministerio Saude (MS) forma ona eqipa Komisaun Nasional kontrola moras hotu ne’ebe lidera husi MS rasik atu halo kontrola ba moras Dengue no Malaria iha distritu no sub-distritu iha rai laran no sira mos kria ona programa fahe informasaun ba komunidade liu husi Televisaun no Radio atu komunidade sira mos hatene halo asaun simples hodi bele prevene labarik no ema hotu husi moras Dengue no Malaria.
Nia informa liu katak distritu ne’ebe mak kada tinan moras Dengue mosu ne’e mak Distritu Dili, Manatuto, Maliana no Suai ne’eduni MS sei halao koperasaun servisu ho lideransa komunitaria no Administrador Distritu sira atu ne’e bele mobiliza komunidade sira hodi hamos bairo laran nune’e bele halo asaun prevensaun ba moras ne’e.
Iha lidun seluk, Chefe suku Afaloicai, Sub-distritu Uatolari, Distritu Viqueque, Constantinho Guterres, hateten katak sira pronto atu kopera ho MS atu mobiliza nia komunidade atu halo limpeza jeral ba sira nia suku hodi bele prevene moras hanesan Dengue no Malario iha tempu udan ne’e.
“Ami Prontu atu servisu hamutuk ho Ministerio Saude atu halo asaun prevensaun ba moras Dengue no Malaria tanba agora dadaun tama ona tempu udan entaun komunidade liu-liu labarik sira fasil atu hetan moras Dengue no Malaria,” dehan Chefe Suku Guterres.