- Publika iha: 24 Janeiro 2012
Relasiona ho informasaun katak Ospital Nasional Guido Valadares (HNGV) infrenta krizi aimoruk, Diretor Servisu Autónomo de Medikamentus no Ekipamentus de Saúde (SAMES), Domingos Alves, lakohi fo komentario tanba tuir nia aimoruk iha.
“Hau lakohi komentario kona ba isu politiku tanba hau nudar Diretor Jeral ne’ebe professional no responsabilidade, ne’ebe hau hare ba realidade ne’ebe iha no servi povu ho buat ne’ebe konkretu, no hau la fo komentario tanba aimoruk iha hela,” hateten Diretor Jeral SAMES Alves, semana kotuk (10/01), iha Kampung Alor, Dili.
Nia hatutan nudar Diretor Jeral iha orientasaun ida de’it, professional hare ba asuntu ne’ebe tenke hare ho diak konaba aimoruk karik iha dezafiu ruma nudar Timoroan ne’ebe servisu iha sentru saúde, ospital no sentru komunitario bele hakbesik aan ba malu hodi bele resolve nune’e labele halo povu hakfodak be-beik.
Nia informa, stok aimoruk husi Janeiru to’o Março tinan ne’e diak tanba stok aimoruk ne’ebe distribui ona ba Ospital no Sentru Saude sira 5% no iha 95 % mak agora dadaun iha armazen SAMES.
Tuir nia orsamentu tinan ida ne’e ba SAMES hamutuk U$5 miloens maibe ho situasaun ideal los ne’ebe iha bele dehan seidauk to’o tanba aimoruk la’os harga mati maibe tenke servisu tuir kbi’it ne’ebe nasaun iha.
Iha parte seluk Administrador HNGV, Rui Manuel Gago Exposto, hateten informasaun kona ba ospital menus aimoruk ne’e, nia fo sai ba media iha tinan kotuk katak antes de ano novo ne’e HNGV hasoru duni difikuldade oituan iha medikamentu stok sai lubuk ida maibe Ministerio Saúde ho SAMES konsege rezolve duni agora laiha problema ho medikamentus tanba iha dia 30 medikamentus tama ona iha HNGV.
“Hau nia komentario ne’e antes de Ano Novu tanba ami atu prepara ba loron bo’ot Tinan Foun ho razaun iha loron bo’ot iha pasiente barak mak tama iha HNGV hanesan asidente no seluk tan maibe hau lahatene tanba sa mak foin hatun,”nia dehan.
Administrador mos husu ba media, kuandu hatun notisia tarde tenke halo uluk cross chek nune’e labele hamosu konfuzaun.