- Publika iha: 17 Janeiro 2012
Klinika Bairo Pite (KBP) nia mehi ba 2012 hakarak aumenta tan abilidade servisu tamba agora dadauk KBP halo konkordansia ho grupo iha Australia atu ajuda klinika dezenvolve ho material no finansas.
“Klinika hakarak fo treinamentu ba funsionario sira iha foho, iha suku ki’ik hakarak, entaun hospital iha kapasidade atu halo sosializa, atu ajuda ema ba kompensa rins, ajuda ema multi resistenti tuberkolose, ajuda ema ho moras oin-oin,” informa Diretor KBP Dr Daniel Murphy, foin lalais, iha KBP, Bairo Pite, Dili.
Dr Dan hatutan katak oras ne’e dadaun KBP tenke haruka ema barak ba Australia no fatin seluk atu tuir treinamentu tanba Timor laiha kapasidade no tanba ne’e klinika hakarak dezenvolve kapasidade atu bele halo buat sira ne’e hotu maibe presiza mak rekursu humanu area saude nian.
Dr. Murphy apela ba Governu ajuda, ema estranjeiru ajuda, atu KBP iha kapasidade atu servisu maibe difikuldade bo’ot mak falta rekursus.
“Maske Governu fulan-fulan fo 15 mil dolar maibe la to’o tanba lor-loron KBP hare ema moras atus tolu, baixa iha Klinika ne’e rasik 50, baixa iha Tibar hamutuk ema 50, haruka ema ba tuir treinamentu iha liur. Ema barak orsamentu ki’ik, tanba fulan hira liu ba, Australia haruka ema ba Japao tan ne’e mak orsamentu ne’ebe Governo fo la to’o.”
Maske KBP infrenta problema oin-oin hanesan menus orsamentu no aimoruk maibe esforsu aan nafatin oinsa mak bele rezolve.
Tuir Dr. Murphy komunidade mos bele ajuda liur hosi halo prevensaun rasik ba moras sira.
“Presiza organizasaun husi komunidade tenke fo kbi’it ba feto sira, tenke tau matan ba nutrisaun, ba saneamentu, vasinasaun, bee, ba hahan no halo limpeza.”
Enfermeira Isilda Freitas, hosi KBP mos hato’o nia mehi ba klinika ba 2012.
“Ami nia mehi ba 2012 mak problema sira ne’ebe durantee ne’e ne’e ami hasoru tiha ona la kohi atu akontese tan iha 2012. No mos aumenta tan ami nia funsionario sira nia kapasidade no mos posibilidade atu servisu,” katak Infermeira Freitas.