Quarta, Fevereiro 19, 2025

Konselor ba ema moris ho moras mental husi NGO PRADET, Noguera Soares hateten konstituisaun RDTL garante katak sidadaun hotu iha direitu atu tuir votasaun inklui sira ne’ebe ho moras mental.Deputada Carmelita Monis, CNRT, hateten ema ho moras mental ne’ebe komprova ho nia estadu medico katak nia bulak la iha responsablidade ka konsiensia saida mak nia halo ne duni tuir los la bele tuir votasaun tamba nia la hatene saida mak nia halo, laiha konsiensia então laiha razaun los ida ba vota.
“Hau konkorda ema bulak kuando iha estradu medico komprova duni estadu medico katak ema ne’e bulak duni nia labele vota tamba nia laiha konsiensia,” hateten Deputada Moniz iha Parlamento Nasional, Dili, semana kotuk (6/1).


Entertantu Deputadu Inacio Moreira, FRETILIN, hateten katak ema bulak ne’e psikolojikamente ema ne’ebe koalia arbiru no barak nia ne’e bulak nia sente nia a’an ne’e laos bulak.
“Hau hanoin proposta ne’e mak liu STAE tenki presiza prepara duni medico iha centro de votasaun sira hotu hotu para ema ne’ebe ba votasaun tenki hare ema ne’e bele ba vota ka lae,” hateten Deputadu Moreira.


Iha parte seluk Konselor Noguera Soares, hosi PRADET, NGO ne’ebe tau matan ka kestaun moras mental no rekuperasaun psikolojika ema moris ho moras mental iha rai laran, hateten katak la os ema hotu ho moras mental mak la iha konsiensia ka inkapasitadu atu bele tuir votasaun.
“Maibe ema sira ne’ebe servisu iha parte eleisaun ne’e mak sira tenki hare tamba ema moras mental laos ema hotu hotu ne’e agresivu ka sira hotu ba estraga sassan. Laos sira hotu hotu halo buat arbiru. Ema moras mental barak maibe iha balun deit mak agresivu liu,” hateten Konselor Soares iha nia knar fatin iha Bidau Toko Baru, Dili.


Tuir mos katak Konstituisaun Republika Demokratika Timor-Leste (RDTL) garante katak sidadaun hotu iha Direitu atu tuir votasaun inklui ema sira ne’ebe hetan moras mental tamba ne’e labele viola sidadaun sira nia direitu atu ba tuir votasaun.
“Tamba ema bulak mos hanesan sidadaun Timoroan ne’e duni iha Konstituisaun mos garante ona katak sidadaun hotu hotu iha direitu atu hetan servisu, hetan educasaun, hetan saude ne’ebe dia,k no buat seluk tan hanesan ema normal sira halo,” hateten  Konselor Soares.


Nia mos haktuir tan katak koalia kona ba oinsa ema moras mental sira bele  tuir eleisaun husi parte lei mak koalia ona dehan katak ema hotu hotu ka sidadaun hotu iha direitu atu hetan direitu nee’ebe hanesan ne’e hatudu katak lei fo ona dalan katak sira mos iha direitu atu bele ba vota.