- Publika iha: 17 Janeiro 2012
Rekursu Umanu Sentru Saúde Uatocarbau (SSU), Subdistritu Uatocarbau, Distritu Viqueque, seidauk sufisiente atu fo atendementu saúde ne’ebe diak ba komunidade tomak iha Subdistritu Uatocarbau hanesan iha uma maternidade SSU ho nia parteira nain rua atu fo atendimentu ba inan partu sira iha suku nen iha subdistritu Uatocarbau.
“Pesoal Saúde iha Sentru Saúde Subdistritu Uatocarbau seidauk sufisiente hanesan iha sala emerjensia, mas liu-liu iha uma maternidade tanba ami nia parteira nain rua deit. Ida nia kondisaun diak, ida seluk kondisaun ladun diak, moras aten, tanba ne’e kuandu pasiente iha bolu, nia sente kondisaun diak entau bele fo atendimentu ba inan partus sira, maibe kondisaun ladiak entau infermeiru sira ajuda fo partu ba inan isin rua sira. Ho ida ne’e ami sujere ba governu liu husi Ministerio Saúde atu aloka tan parteira balun mai iha ami nia Sentru Saúde hodi bele fo atendimentu ba inan isin rua sira diak liu tan,” dehan Xefi SSU Jeremias Mota, semana kotuk (3/1), iha Uatocarbau, Viqueque.
Xefi Mota hateten tan katak rekursu umanu sei menus tebes tanba iha SSU iha Health Post barak tuir lolos kada Health Post ida tenke iha infermeirus nain lima maibe tanba rekursu umanu la to’o entau Health Post ida iha pesoal saúde ida mak fo asistensia ba Departamentu hotu.
Tuir komunidade Antonio da Costa katak laos SSU deit mak infrenta problema falta rekursu umanu maibe kuaze iha centru saúde sira iha rai laran hotu infrenta problema ne’e no governu liu husi Ministerio Saúde seidauk bele responde ba problema ne’e tanba pesoal saúde ne’e laos ba bolu deit maibe presiza forma ho tempu ne’ebe naruk.
“Hanesan komunidade iha Subdistritu Uatocarbau agradese no rekuinese servisu infermeirus no parteira sira iha Sentru Saúde Uatocarbau maske ho rekursu umanu ne’ebe menus no fasilidade ne’ebe menus maibe ho profesionalismu ne’ebe sira iha hodi fo asistensia ne’ebe sufisiente ba ami komunidade iha Subdistritu Uatocarbau Distritu Viqueque,” dehan komunidade da Costa.
Xefi SSU Mota informa tan katak moras ne’ebe registo aas iha SSU mak moras Ispa, Malaria, no Diarea. Nia hatutan katak moras sira ne’e mosu tanba atitude komunidade rasik no katak komunidade barak mak gosta husik animal entau bele hafoer bairo no bele afeta ba sira nia saúde.
Nia haktuir tan katak SSU kada fulan halo kampania ba komunidade atu moris iha ambiente ne’ebe mos liu husi programa Servisu Integradu Saúde Komunitaria (SISCA) maibe komunidade rasik laiha konsensia atu halo tuir informasaun ne’ebe pesoal saúde sira hato’o ba sira.