- Publika iha: 12 Janeiro 2012
Relasiona ho informasaun ne’ebe hato’o husi membru parlamentu balun iha plenaria Parlamentu Nasional semana kotuk (13/12) katak Hospital Nasional Guido Valadares (HNGV) falta bee sei la tolera tan tanba Ministerio Saude bebeik fo sai katak problema sira ne’e sei rezolve.
“Komisaun F sei la iha toleransia ba hahalok sira hanesan ne’e kontinua sai problema iha HNGV tanba bainhira Ministerio Saúde sira halo enkontru ho Komisaun F sira sempre dehan problema bele resolve. Entau agora sira tenke resolve prolema ne’e ho diak, ami hakarak bee kontinua lao normal,” dehan Vice Presidente Komisaun F, Deputado Francisco Jeronimo.
Nia hatutan katak Komisaun F sei koalia makas liu tan atu governu tenke responsabiliza no sei halo fiskalizasaun ba HNGV iha tempu badak atu hare klean liu tan prosesu servisu iha hospital nasional.
Liu hosi telefone Chefe Departamentu Maternidade, Sauzina Saldanha, HNGV, hateten katak nia labele fo komentario ba asuntu ne’e tanba momentu akontesementu HNGV falta bee mos nia halo viagen iha liur ne’eduni nia lahatene.
Iha parte seluk Chefe Departamentu Ddministrasaun Finanças no Logistika, HNGV, Santana Martins, rekuinesehe katak iha loron tolu iha semana kotuk hospital falta duni bee mos maibe sira konsege resolve. Nia esplika katak falta bee tanba makina bomba bee rua ne’ebe iha ospital keima dala ida deit ne’ebe rezultadu husi elektrisidade ne’ebe mate lakan iha kapital Dili laran.
“Ami konsege resolve problema ne’e liu husi alternativa ne’ebe ami iha. Ami kontaktu ba kompanai sira ne’ebe servisu relasiona ho distribuisaun bee mos, bomberus, SAS. Ami mos halo manutensaun urjente ba iha makina bomba bee ne’ebe aat, maibe agora bee mos komesa lao diak fali ona,” dehan Chefe Martins.
Nia hatutan katak iha tempu laiha bee mos fo duni impaktu duni ba pasiente sira atu fase roupa foer no parte dapur nian atu tein hahan ba pasiente sira ne’e atraza inklui mos sala operasaun maibe la iha buat ida ke akontese seriu.