- Publika iha: 02 Novembro 2011
Make menus aimoruk preokupasaun ba sentrus sauda barak iha rai laran, ba Centro Saude Formosa (CSF), mask dala ruma mos ai-moruk tarde atu tama ne’e tanba pasa informasaun tarde ba iha Ministerio Saude maibe ne’e laos kestaun bo’ot ida ba pesoal saude sira atu atende pasiente sira.
“Menus aimoruk laos kestaun bo’ot ida ba ami, aimoruk laos laiha lae aimoruk iha maibe kestaun administrasaun no komunikasaun no tanba ami hato’o informasaun ba iha distritu mak tarde entau pedidu mos tarde aimoruk mos mai tarde mais aimoruk tarde laos ami la servisu lae ami sempre servisu atu atende pasiente sira” dehan Responsabel CSF, Jaime Dos Reis Belo semana kotuk (12/10) iha Bairro Formosa, Dili.
Responsavel Belo mos hatutan katak aimoruk mai tarde laos fulan tomak maibe semana ida ka loron rua ida ne’e normal iha ne’ebe deit aimoruk sempre tarde. Aimoruk ne’ebe menus iha sentru saude Formosa mak aimoruk parsetamol tanba agora dadaun tempu bailoron entau pasiente barak mak hetan moras mear, ulun moras, inus metin, isi manas tanba ne’e mak aimoruk ne’e menus maibe laos fulan tomak maibe loron rua deit CSF hato’o ona ba iha SAMES atu fo apoiu nafatin aimoruk ba iha CSF ne’e rasik.
Nia informa tan katak aimoruk ne’ebe Centru Saude Formosa presiza liu mak Aimoruk isin manas-malirin hanesan aimoruk Parsetamol, estomago moras, ulun moras, mear no vitamina, sira hato’o ona ba iha distritu atu bele pasa aimoruk ne’ebe kestiona iha leten ba iha CSF.
Entertantu pasiente ho naran Fransisca dehan katak sira sempre mai konsulta iha Centru Saude Formosa maibe nunka rona menus aimoruk tanba sira sempre simu aimoruk ne’ebe sira presiza atu kura sira nia moras hanesan aimoruk parasetamol.
“Ami sente kontente tanba dala barak ema kestiaona menus aimoruk maibe ami mai konsulta iha CSF la iha aimoruk ida falta ba ami nia moras, karik menus maibe CSF sempre esforsu an atu labele menus aimoruk ba nia pasiente sira ami agradese tebes ba pesoal saude CSF nia servisu.”
Jaime hatutan tan katak moras Ispa (infeksaun sistema respiratoriu) kontinua registu aas iha sentur saude Formosa tanba inpaktu bailoron ne’ebe naruk halo rai rahun ne’ebe makas no iha sidade laran kareta motor barak nia suar sira mos sai inpaktu ba komunidade entau fasil atu hetan moras ispa alende moras ispa moras ne’ebe registu aas iha CSF mak moras diarea, malaria, kulit. No moras ispa maioria husi labarik tinan lima to’o ferik katuas sira.