- Publika iha: 01 Novembro 2011
Klinika Merry Stopes International (MSI) to agora seidauk iha fatin permanente ba sira tanba aluga de’it ema nia uma hodi hala’o sira nia servisu.
MSi ne’ebe harii dahuluk iha sentru Bairo Pite agora muda fali ba iha edifisiu alugadu seluk iha area Vila Verde, Katedral nia sorin, katak tanba fatin ne’e aluga no mos la’os permanente.
Tuir Xefe Marketing MSI, Mariano da Silva, desizaun atu muda bazeia ba faktores oin oin deit maibe dalaruma iha mudansa ba presu aluguer uma no ladun iha konkordansia entre uma nain entaun MSI foti desizaun atu muda fali ba fatin seluk.
Xefe da Silva haktuir katak maske MSI buka hela nia fatin permanente ida ne’e sei bele lori tempu kleur.
“Waihira ami muda kliente ne’e mai iha Villa Verde bele halo konfuzaun ba kliente sira ne’ebe mai hala’o tratamentu maibe ami servisu hamutuk ho ekipa Marketing atu hato’o informasaun liu husi jornal, Televizaun.”
Iha parte seluk Maria da Costa hanesan kliente ida baibain ba halo tratamentu iha MSI sei iha konfuzaun ba fatin ne’ebe la permanente.
“Hau senti triste tanba wainhira atu mai halo tratamentu sei husu ba mai mak foin hetan fatin ne’e, tan ne’e ha’u husu ba Governu sei bele karik tau matan ba klinika ne’e,” hateten pasiente da Costa.
Iha parte seluk tuir Rozalia [apelido la fo sai] hanesan uma na’in ba uma uluk ne’ebe MSI aluga iha Bairo Pite hateten katak klinika ne’e muda ba Vila Verde atu besik ho sira nia Edifisiu.
“Hau senti diak tanba sira bele iha kontrola maximu ba nia servisu,” hateten uma nai’in Rozalia.
Klinika Merystopes loke iha area Bairo Pite iha fulan Agostu 2006, no loke Klinika Saude Sexual no Reproduktiva nia iha fulan Marsu 2007. Klinika Merystopes ne’e hetan lisensa husi Governu no suporta husi Komisaun Europa, AusAID, World Bank, UNFPA, no mos sai nudar parseiru ba Ministeriu Saude Timor-Leste nian.