- Publika iha: 31 Outubro 2011
Relasiona ho asina akordu ne’ebe Governu Timor Leste liu husi Sekretario Estado Joventu e Desportu ho Fundasaun Real Madrid dia 20 de Setembru iha fundasaun Real Madrid katak Governu Timor-Leste iha ona planu atu loke eskola desportu ba Timoroan sira ne’ebe iha talentu ba area desportu atu bele dezenvolve Nasaun Timor-Leste iha area disportiva.
“Hau orgullho tebes ho planu Governu Timor-Leste ne’ebe atu loke eskola foot ball iha Timor-Leste tanba ho inisiativa ne’ebe governu iha bele dezenvolve joventude sira nia talentu iha area desportu”dehan joventude Abetu Mangalaes, foin daudauk (10/10), iha Comoro, Dili.
Tuir joventude ne’ebe iha talentu mos ba football katak ho inisiativa ne’ebe governu foti atu loke eskola desportu espesifikamente ba foot ball ba Timoroan sira ne’ebe iha interese ne’e planu ne’ebe diak tebtebes tanba ho programa ne’e bele hatene oinsa koineshementu joventude Timor-Leste iha area desportu no bele promove nasaun Timor-leste iha Nasaun estrangeiru.
Entertantu Presidente komisaun H ne’ebe trata asuntu Joventude, Desportu e Formasaun Professional, Deputado Antonio Cardoso, katak planu ne’e diak se bainhira governu iha intensaun atu loke duni eskola desportu nian no governu Timor Leste liu husi Sekretario Estado da Joventude e Desportu atu kopera ho Federasaun Football Timor Leste (FFTL) atu joven sira bele dezenvolve sira nia talentu no bele partisipa iha eventu nasionais no internasionais.
“Hau nia hanoin programa ne’e se governu iha nia konsensia no iha duni nia solidaridade boavontade atu bele loke duni eskola espesifiku foot ball ba joven sira hau hanoin ne’e diak tanba ita iha federasaun rasik no ita hotu akonpaya katak federasaun la lao mesak maibe kopera ho governu liu husi sekretario estado juventude e desportu,” dehan Deputado Antonio Cardoso.
Deputado hatutan katak Football iha mundu ne’e sai hanesan industria bo’ot ida tanba ema jogador sira bele hetan osan Milloes iha tempu ne’ebe determinado hanesan Messi jogador husi Argentina maibe nia joga iha Europa tanba nia jogador ne’ebe koinhesido iha mundu.
Cardoso fiar katak Timor-Leste mos bele involve iha eventu Internasional konaba desportu espesifikamente foot ball tanba realidade ne’ebe iha Timor oan sira ne’ebe ho idade 16 anos hetan susesu iha Korea bainhira tuir eventu football iha nee’ba.