- Publika iha: 31 Outubro 2011
Tuir dadus ne’ebe iha durante fulan Setembru nia laran total pasiente ne’ebe hetan transfusaun ran iha Hospital Nasional Guido Valdares (HNGV), iha Dili, hamutuk 129 pesoas ne’ebe uza pakote ran hamutuk 139 ne’ebe Departamentu de Sangue koleta.
Maibe HNGV sei presiza nafatin pakote ran tanba iha pasiente seluk iha Hospital Referral iha rai laran ne’ebe mos presiza pakote ran ne’e atu bele hetan transfusaun ran.
“Pasiente balun sei presiza pakote ran ne’eduni husu ba populasaun tomak atu bele fo kontribuisaun ba maluk sira ne’ebe presiza halo transfusaun ran liu husi donor ran tanba ran la os fabrika ne’e duni atu hetan ran difisil tebes” hateten Xefe Departamentu Banco de Sangue, HNGV, Tomas Adelino, foin lalais (10/10).
Xefe Adelino hatutan katak pakote ran sira ne’ebe Departamentu Banco de Sangue koleta hamutuk 139 iha fulan Setembru no Outubru laran hosi doadores husi Guarda Nasional Republikana (GNR), hosi Portugal, nain 37.
Doadores seluk mos hosi Cruz Vermella Timor-Leste (CVTL), UNPOL no Igreja Protestante Timor-Leste no Bombeiros Timor-Leste. Agora dadaun Banco de Sangue, HMGV, iha pakote ran hamutuk 70 maibe prepara ona atu halo transfusaun ba pasiente sira ne’ebe presiza.
Pasiente ne’ebe hetan transfusaun ran husi ran ne’ebe Banco de Sangue koleta mak pasiente husi maternidade nain 23, pasiente iha sala operasaun no rawat nain 20, iha sala interna nain 39, sala pediatria nain 45, no maioria tanba labarik barak mak presiza ran. Banco de Sangue mos kontribui ba iha Hospital Referral dala rua no Klinika Bairo Pite dala rua.
Xefe Adelino agradese ba organizasaun sira ne’ebe fo ona kontribuisaun liu husi donor ran atu ajuda pasiente sira ne’ebe presiza halo transfusaun ran iha HNGV no hospital referral seluk iha rai laran tomak.
Entertantu pasiente Asika (apalido la fo sai) hateten katak servisu Banku de Sangue durante ne’e lao diak tanba sira konsege ajuda ema barak liu husi transfusaun ran ne’ebe sira koleta husi doadores sira. Nia apela mos ba familia sira atu fo nafatin kontribuisaun ba familia ne’ebe presiza halo transfusaun ran bainhira hetan moras.
“Hau sente servisu Banco de Sangue lao diak tanba ho esforsu ne’ebe sira konsege ajuda ona ema lubuk ida nia moris liu husi ran ne’ebe sira koleta” hateten pasiente Asika.