- Publika iha: 14 Outubro 2011
Durante fulan Agostu no Setembru, iha inan isin rua hamutuk 186 mak partus iha Klinika Bairo Pite (KBP) enkuantu nain rua (2) partus kaduak ho normal ho atendementu husi parteira sira.
“ Sim husi inan nain 186 sira ne’e hot-hotu partus normal maibe iha fulan Agostu iha partus kaduak nain rua no kidun mak uluk ida, iha fulan Setembru partus kaduak nain rua (2),”hateten Responsabilidade Maternidade KBP,Francisca Cardoso,semana kotuk (27/09), iha nia knar fatin Bairo-Pite,Dili.
Husi numeru ne’e, iha Agostu iha inan nain 101 no Setembru iha deit inan nain 85, total fulan rua nia laran mak iha 186 ne’e.
“Iha inan balun mak foin idade 17 no balun mos idade 40.Inan ho idade 17 balun partus araska tanba idade sei nurak no mentalidade atu sai inan seidauk iha enkuantu ba inan sira ho idade 40 ne’ebe partus oan primeiru ami trans fere ba iha Ospital bo’ot,”nia informa.
Entretantu iha Centro Saúde Formoza (CSF), parteira Maria Fatima Boavida hateten durante Agustu no Setembru inan ne’ebe partus iha CSF hamutuk 31 e sira partus ho normal.
Tuir nia, idade ne’ebe favoravel ba inan sira atu isin rua no partus mak idade 20 to’o 34 “sira ne’e la tama ba inan risku ida, maibe ba sira ne’ebe ho idade 19 mai kraik ne’e risku tanba sei nurak,fisikamente seidauk preparadu,”nia dehan.
Entertantu Linda Maria, inan ne’ebe partus iha CSF sente kontente ho atendementu parteira sira tanba atende sira ho diak.
“hau sente partus iha ne’e diak no seguru loos no ita partu iha ospital hanesan dalan ida diak” dehan Maria.