- Publika iha: 07 Outubro 2011
Tuir Diretor Servisu Saude Distritu Manatuto, Francisco Soares katak oras ne’e dadaun Ospital Manatuto menus ambulansia hodi tula ema moras sira husi sub-distritu ba Distritu.
“Agora ami iha deit ambulansia ida ne’ebe uza tula pasiente sira husi Sub-distritu ba Distritu maibe kondisaun ambulansia ne’e rasik agora aat ona,”hateten Diretor Servisu Saud Distritu Manatuto, Francisco Soares, semana kotuk (19/09) iha Dili.
Soares hatutan, durante ne’e sira uza deit kareta multi funsaun ida ne’ebe ajuda husi governu Portugal hodi tula ema moras sira iha distritu laran.
“Ne’ebe ba ami ne’e la sufsiente atu tula pasiente sira, liu-liu bainihra atu transfere moras ba Ospital boot Dili, ami uza fali Hi-lux hodi tula moras sira,”nia preokupa.
Kestaun ne’e nia parte hato’o ona ba iha Diretor Jeral Ministeriu Saude nian maibe to’o agora laiha rezultadu.
Entretantu hatan ba kestaun ne’e, Ministru Saude Nelson Martins katak problema menus ambulansia laos deit iha Distritu Manatuto maibe kuaze ke iha teritoriu tomak.
“Ita iha doasaun ambulansia mas la to’o,ita presiza sosa tan ambulansia maibe orsamentu limitadu tanba orsamentu ba ministeriu nian oituan deit,”Martins dehan.
Tanba ne’e nia husu atu uza ho kuidadu ambulância sira ne’ebe iha ona tanba kondisaun ambulância sira ne’e ladun di’ak ida.